Саха сирин Ил Дархана Айсен Николаев суһал штаб мунньаҕар иһитиннэрибитинэн, коронавируһунан ыалдьан үтүөрбүт дьон ыалдьыбыт дьон ахсааныттан туруктаахтык элбээбит. Ол гынан баран өрөспүүбүлүкэҕэ уустук санитарнай-эпидемиологическай балаһыанньа оннунан хаалар.
Саха сиригэр кэнники кэмҥэ балыыһаҕа COVID-19 ыарыынан ыалдьар дьон ахсаана сыыйа аҕыйаан иһэр. Билигин өрөспүүбүлүкэ балыыһаларыгар коронавируһунан ыалдьыбыт дьоҥҥо 26 %-н куойка баар.
Ол эрээри, коронавируһунан ыалдьыы саҥа түбэлтэлэрэ аҕыйаабат. Билигин 45 киһи ИВЛ аппаратыгар холбонон сытар.
«Коронавируһу утары охсуһарга үрдүк таһымнаах коллективнай иммунитеты олохтуохтаахпыт. Быһыы хампаанньата бүтэһик нэдиэлэлэргэ, уһун өрөбүллэргэ ситиспит тэтимэ оннунан хаалара ирдэнэр. Күн аайы өрөспүүбүлүкэҕэ быһыы бастакы компоненын түөрт тыһыынчаттант тахса киһи ылар. Бу динамиканы тутуһуу суолтата улахан», — диэтэ Айсен Сергеевич.
Өрөспүүбүлүкэҕэ вакцина бастакы компоненын 428 415 киһи (59,75%) ылбыт. Быһыы иккис компоненын 54,46% киһи ааспыт. Саха сиригэр коронавирустан утары быһыы иккис компоненын ылбыт 39 722 киһи алта ый ааспытын кэннэ ревакцинацияны ааста.
Намҥа уонна Чурапчыга вакцинация көрдөрүүтэ 50%-ны тахса илик. Бу оройуоннарга Ил Дархан сорудаҕынан көһө сылдьар медицинскэй биригээдэлэр үлэлэрин күүһүрдүөхтэрэ.
Вакцинация тэтиминэн куһаҕана суох көрдөрүү Дьокуускайга бэлиэтэннэ. Бүгүҥҥү күҥҥэ өрөспүүбүлүкэ киинигэр вакцина бастакы компоненын 62% киһи ылбыт, вакцинация толору кууруһун 55% киһи ааспыт.
Алтынньы 11-18 күннэригэр Дьокуускайга сууккаҕа 489 киһи вакцинацияны ааспыт эбит буоллаҕына, билигин сууккаҕа 1 326 киһи быһыы ылар. Өрөспүүбүлүкэ киинигэр уһун өрөбүллэр иннинээҕи кэмҥэ тэҥнээтэххэ, вакцинация тэтимэ 88% улаатта.
Айсен Николаев куорат салалтатыгар вакцинация тэтимин намтаппат соруйда уонна республика киинигэр коллективнай иммунитет олохтонноҕуна киин уонна илин эҥэр улуустар санитарнай-эпидемиологическай балаһыанньалара тупсуоҕа.
Саҥа дьыллааҕы бырааһынньыктар хайдах ыытыллыылара вакцинация тэтимиттэн уонна коллективнай иммунитеттан тутулуктаах.
