Атырдьах ыйын 27-28 күннэригэр Го оонньууга Саха Өрөспүүбүлүкэтин Ил Дарханын Кубога уонна Уһук илиҥ бастыыр иһин күрэх аһыллыытын туһунан Айсен Николаев санаатын үллэһиннэ.
«Кэнники сылларга Го оонньуу биһиги дойдубутугар уонна өрөспүүбүлүкэбитигэр киэҥник тарҕаммытынан үөрэбин. Бу оонньуу киһини сытыытык толкуйдуурга, баар балаһыанньаны араас өттүттэн сыаналыырга, сөптөөх быһаарыныыны ылынарга үөрэтэр», — диэн Айсен Николаев Telegram ханаалыгар суруйар.
Өрөспүүбүлүкэҕэ араас дойдулартан күүстээх оонньооччулар муһуннулар диэн Ил Дархан бэлиэтиир. Ол курдук, тэрээһини ыытарга генеральнай спонсордарынан буолбут «Полиметалл» уонна «Росатом» хампаанньыйаларга махталын тиэртэ.
«Го күрэхтэһиитин көмөтүнэн Саха сиригэр оонньуу биллэ сайдыаҕа. Бары кыттааччыларга умнуллубат түгэннэри, ситиһиилэри баҕарабын», — диэн Айсен Николаев түмүктээтэ.
