Саха сирин Ил Дархана Айсен Николаев бүгүн, от ыйын 25 күнүгэр, мунньах кэмигэр СӨ Бырабыыталыстыбатыгар халаан содулун туоратарга, баһаардары умуруорарга, сүөһү аһылыгын бэлэмнииргэ соруктары туруорда. Бу туһунан СӨ бырабыытылыстыбатын уонна баһылыгын дьаһалтатын пресс-сулууспата иһитиннэрэр.
Ону тэҥэ Айсен Сергеевич халаантан эмсэҕэлээбит нэһилиэнньэлээх пууннар олохтоохторугар төлөбүр кэмигэр төлөнөрүн хонтуруоллуурга соруйда.
«Бырабыыталыстыба суукка иһигэр түргэнник быһаарыы ылыныахтаах, олохтоохторго көмө түргэнник тиийиэхтээх», – диэтэ Айсен Николаев.
Саха сиригэр билиҥҥи туругунан уопсайа 61 896,4 га иэннээх 60 ойуур баһаара уонна Өймөкөөн улууһугар 775 гектар иэннээх икки ландшафтнай баһаар баар. Ааспыт сылга баччаларга 1 613 240,5 га иэннээх сиргэ 154 ойуур баһаара бэлиэтэммит. Айсен Николаев баһаары утары үлэни күүһүрдэргэ эттэ.
Сүөһү аһылыгын бэлэмнииргэ бырабыыталыстыба оройуоннарга субсидия ыытар. Ону улуустар бэйэлэрэ хаһаайыстыбаларга түҥэтиэхтэрэ. Быйылгы оттооһун былаана — 441 тыһ. туонна.
Өрөспүүбүлүкэҕэ быһыы биэрэр пууннар үлэлиир кэмнэрин, үлэһит ахсаанын элбэттилэр. Билигин коронавирус утары вакцинаны медицинцкэй тэрилтэлэргэ, эбии пууннарга биэрэр буолуохтара.
