Бүгүн креативнай индустрия форумун пленарнай сессията олус таһаарыылаахтык ааста. Манна иэйии күүһүгэр эрэнэри таһынан бырайыактары олоххо киллэрэр дьон муһунна.
Саха сирин Ил Дархана, РФ Уһук Илини уонна Арктиканы сайыннарыы министиэристибэ, Стратегическай көҕүлээһиннэр ааҕыныстыбата, Уһук Илин сайдыытын корпорацията уонна Россия регионнарын, тас дойдулар бэрэстэбиитэллэрэ уопуттарын үллэһиннилэр, саҥа быһаарыылары толкуйдаатылар, уопсай дьыалҕа күүһү-уоҕу түмэргэ кэпсэттилэр.
Саха сирэ бырайыактарын сырдатта. Киинэ, ИТ, анимация, муода, ырыа барыта өрөспүүбүлүкэҕэ үрдүк таһымҥа сылдьар. Ол курдук, форумҥа Ил Дархан креативнай экономика экосистемата хайдах оҥоһуллубутун уонна дойду үрдүнэн бастыҥнар ортолоругар киирии туһунан кэпсэээ.
«Биһиэхэ барыта көннөрү өйдөбүлтэн саҕаламмыта. Саҥа хайысхалары сайыннарар туһуттан дьоҥҥо эрэли үөскэтиэххэ наада. Уратытык толкуйдуур, тулалыыр эйгэтин тупсарыан баҕалаахтары өйөөбүппүт. Биһиги үлэни кытаанахтык ыытар оннугар кэпсэтиини, өйөбүлү уонна дьоҥҥо аһаҕас буолууну ордорбуппут. Маннык ньыманан эйгэ үөскээбитэ. Иэйии сайдар кыахтааҕа, айар үлэ инникилээҕэ», – диэн Айсен Николаев эттэ.
Бүгүҥҥү күҥҥэ өрөспүүбүлүкэҕэ ИТ-пааркалар, айар кластердар, акселератордар, үөрэх бырайыактара үлэлииллэр. Креативнай экономика сайдыытыгар ыйаах ылыллыбыта, сыаллара, соруктара быһаарыллыбыта. Саамай сүрүнэ диэн бэйэтин дьыалатыгар эрэллээх, иннин диэки дьулуһар дьон түмсүүтэ баар буолла.
