Россия олохтооҕо Володар Мурзин Нью-Йорк АХШ куоратыгар рапид саахымакка (түргэн саахымакка) аан дойду чөмпүйүөнэ аатын сүктэ. Кини 13 туурга аан дойду бастыҥтан-бастыҥ саахыматчыттарын кыайда.
Дойду бэрэсидьиэнэ Владимир Путин 18 саастаах гроссмейстеры эҕэрдэлээтэ. Володар Россия саахыматын оскуолатын үрдүк аптарытыатын дакаастаата диэн бэрэсидьиэн бэлиэтээтэ.
Володары Саха сирин олохтоохторо 2023 сылга I-кы «Ил Дархан Куубагар» кыттыбытынан өйдүүллэр. Ол саҕана дойду саамай эдэр гроссмейстера үрүҥ көмүс мэтээли ылбыта, Куубак чэрчитинэн ыытыллыбыт блиц-оонньууга кыайбыта. Блиц-оонньуу Дьокуускай куорат Ленин болуоссатыгар -52 кыраадыс тымныыга ыытыллыбыта, Володар норуоттар икки ардыларынааҕы гроссмейстер, Россия уолаттарын сүүмэрдэммит хамаандатын старшай тренерэ Михаил Кобалийы хоппута.
Ону тэҥэ өрөспүүбүлүкэтээҕи саахымат-шашка киинигэр Володар Мурзин маастар-кылааһы ыыппыта уонна биир кэмҥэ 42 саахыматы сөбүлээн дьарыктанар дьону кытта оонньообута.
«Турниртан олус диэн дуоһуйдум, тэриллиитинэн мин бу иннинэ кытта сылдьыбыт күрэхтэһиилэри кытта холоон көрдөххө бастыҥнар ортолоругар киирсэр. Тэрийээччилэр Саха сиригэр саахыматы сайыннарыан баҕалаахтара көстөр», — диэн күрэхтэһии кэнниттэн Володар Мурзин этэ сылдьыбыттаах.
Ил Дархан Айсен Николаев бэлиэтээбитинэн, Куубак тэриллиитэ Саха сиригэр саахымат сайдыытыгар сүрүн оруоллаах, саҥа саахыматчыттары таһаарар уонна кинилэр таһымнарын үрдэтэр, сайыннарар кыаҕы биэрэр.
2025 сылга Ил Дархан Куубага үһүс төгүлүн киин куоракка муус устар 1-10 күннэригэр ыытыллыаҕа. Ону тэҥэ бу кэмҥэ бүтүн Россиятааҕы «БЛИЦ Гран При России» күрэхтэһии блиц түһүмэҕэ уонна эр дьон ортолоругар бүтүн Россиятааҕы «РАПИД Гран При России» күрэхтэһии рапид түһүмэҕэ буолуохтара.
Хаартыска: Мария Васильева / ЯСИА
