Ил Дархан Айсен Николаев «Прямой разговор» биэриигэ иһитиннэрбитинэн, ыччат бэйэтин сайыннарыытыгар Muus uSTAR бэстибээл сүрүн үөрэх былаһаакката буолуохтаах.
«Бу, бастатан туран, үөрэх бэстибээлэ, саататар тэрээһин буолбатах. Эдэр ыччат аныгы үөрүйэхтэри, сатабыллары үөрэтиэҕэ. Араас эйгэттэн исписэлиистэр кэлэннэр ыччаппытын үрдүк таһымҥа таһаарыахтара», – диэтэ Ил Дархан.
Кулун тутар 25-26 күннэригэр Дьокуускайга «Muus uSTAR» өрөспүүбүлүкэтээҕи бэстибээл ыытыллыаҕа.
Тэрээһин ыытааччылара — Антон Комолов уонна Михаил Башкатов. Кинилэри кытары Саха сириттэн куонкурус нөҥүө талыллыбыт ыытааччылар бэстибээли иилээн-саҕалаан ыытыахтара. Сүрүн ыалдьыттар — ырыаһыт Клава Кока, хореограф Егор Дружинин, режиссер Алексей Учитель, «Союзмультфильм» дириэктэрэ Борис Машковец уонна олимпийскай чемпионнар. Ыҥырыллыбыт ыалдьыттар толору испииһэктэрэ тэрээһин буолара чугаһаатаҕына биллиэҕэ диэн бэлиэтэнэр.
Быйыл бэстибээл бырагырааматыгар 12 хайысха киирдэ, ол иһигэр кинематограф, анимация, киберспорт, муода, суруналыыстыка, наука, экология уо.д.а. Muus uSTAR тэрээһин чэрчитинэн Россия ыччатын грант куонкуруһун тэрийиэхтэрэ.
