От ыйын 7 күнүгэр Ил Дархан Айсен Николаев Нерюнгри оройуонугар үлэ сырыытынан Нерюнгритээҕи лесничество салалтатын кытары ойуур баһаарын балаһыанньатыгар сыһыаннаах боппуруостары кэпсэттэ уонна кинилэр тиэхиньикэлэрин көрдө.
Нерюнгритээҕи лесничество салайааччытын эбээһинэһин толорооччу Евгения Прозорова Ил Дархаҥҥа билиҥҥи кэмҥэ ойуур баһаара нэһилиэнньээх пууннарга кутталы үөскэппэтин туһунан эттэ. Тэрилтэ исписэлиистэрэ уоту утары охсуһарга аныгы миэрэлэринэн үлэлииллэр — сири хорутуу, уоту утары ыытыы, сири-уоту кэтииллэр, ону тэҥэ хонтуруолга коптер көмөтүн туһаналлар.
Евгения Прозорова этэринэн, Нерюнгри оройуонугар хойуу буруо Амур уобалаһын баһаардарыттан кэлэр. Билигин Хани бөһүөлэк чугаһыгар Амур уобалаһын кытта кыраныыссаҕа ойуур баһаарыттан уустук балаһыанньа турар. Лесничество таһаарыылаах үлэтинэн нэһилиэнньэлээх пууҥҥа куттал суоһаабат.
Якутлесресурс Нерюнгритээҕи филиалын үлэһиттэрэ үрдүк квалификациялаах каадырдар тиийбэтин уонна баазан өрөмүөнүн туһунан боппуруос туруордулар. Ил Дархан СӨ бырабыыталыстыбатын бэрэссэдээтэлэ Дмитрия Садовниковка тустаах боппуруоһу хонтуруолга ыларга соруйда.
Ил Дархан Нерюнгритээҕи лесничествоны уонна ойуур баһаардарын бохсор тэриллиилэр үлэлэрин үрдүктүк сыаналаата.
«Бары ылыллар быһаарыылар — билиҥҥи балаһыанньаҕа сөптөөхтөр. Билигин Нерюнгригэ, Өлүөхүмэҕэ куйаас, кураан уонна этиҥнээх күн-дьыл турар. Кэлэр нэдиэлэлэргэ баһаары умуруорууга күүстээх үлэни салҕыахпыт», — диэн Ил Дархан бэлиэтээтэ.
