Саха сирин Ил Дархана Айсен Николаев Росавиация салайааччыта Дмитрий Ядровы кытта оробуочай көрсүһүүнү ыытта. Көрсүһүүгэ РФ тырааныспарга миниистирин солбуйааччы Валентин Иванов кыттыыны ылла.
Көрсүһүү кэмигэр авиация үлэтигэр уонна саха дьонун олоҕун хаачыстыбатын үрдэтэр сыаллаах боппуруостары көрдүлэр.
Саха сиригэр авиация улахан оруоллаах. Ыраах оройуоннар икки ардыларыгар сибээһи хааччыйар, олоххо наадалаах өҥөлөрү өйүүр.
Биир сүрүн тиэмэнэн Зырянкаҕа саҥа аэропорт тутуута буолла. Бу эбийиэк Үөһээ Халыма оройуонугар улахан суолталаах. Бырайыак хойутааһына суох олоххо киирэрин хааччыйар туһугар үбү-харчыны кэмигэр тыырар наадалааҕын тоһоҕолоотулар.
Хотугу аэропордар ситимнэрин балаһыанньатын сиһилии ырыттылар. Кинилэр тэтимнээхтик үлэлииллэригэр тиэхиньикэлэри саҥардыы уонна хотугу «Аэропорты Севера» тэрилтэҕэ эбии өйөбүл наада. Бу өрөспүүбүлүкэ авиационнай систиэмэтэ туруктаах буоларыгар олус наадалаах.
Ону тэҥэ регионнар икки ардыларынааҕы маршруттарга чэпчэтиилээх анал тарыыптары индексациялааһыны, Дьокуускай аэропордун үлэтин боппуруостарын дьүүллэстилэр. Бары быһаарыылар олохтоохторго чэпчэки сыаналаах рейстэри уонна айан эрэллээх буолуутун хааччыйыахтаахтар.
