Атырдьах ыйын 1 күнүттэн 3 күнүгэр диэри Дьокуускай куоракка «Аҕыйах нэһилиэнньэлээх сиргэ онкологическай көмөнү оҥоруу суолталаах ыйытыылара» норуоттар икки ардыларынааҕы кыттыылаах регионнар икки ардыларынааҕы кэмпириэнсийэ ыытыллар.
Кэмпириэнсийэ чэрчитинэн, Ил Дархан Айсен Николаев Россия уонна Казахстан сүрүн онкологтарын кытта көрүстэ.
«Онкология эйгэтин аан дойдутааҕы экспертэриттэн саҥа технология көмөтүнэн ыарыыны маҥнайгы кэрдииһигэр буларга улахан кыах бэриллэр. Ыарыы үөскүүр биричиинэтин барытын учуоттуур наада, ол иһигэр этническэй өрүтүн», — диэн Ил Дархан эттэ.
Айсен Николаев бэлиэтээбитинэн, Уһук Илин биир улахан онкологическай киинэ Дьокуускайга арыллыбытынан Саха сирин олохтоохторо ыраах барбакка, үрдүк таһымнаах медицинскэй көмөнү туһаналлар. Дойду бэрэсидьиэнэ Владимир Путин көмөтүнэн, онкология киинигэр ыарыыны эмтииргэ усулуобуйа барыта баар.
