Айсен Николаев ыам ыйын 1 күнүнэн – Саас уонна Үлэ бырааһынньыгынан эҕэрдэлээтэ. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
«Биһиги Үлэ киһитин сүҥкэн суолтатын уопсастыбабыт сөптөөхтүк сыаналыырыгар баҕарабыт. Өрөспүүбүлүкэбит үгүс көрдөрүүлэринэн бастыҥнар ахсааннарыгар киирэрин туһугар биһиги хотугу тыйыс уонна кэрэ кыраайбытыгар үгүс көлүөнэ дьон үлэлээбитэ. 2019 сылтан эрэгийиэннээҕи баалабай бородуукта кээмэйинэн уонна бырамыысыланнай үүнүү тэтиминэн Саха сирэ Россия Федерациятыгар бастыҥнар кэккэлэригэр сылдьар, Уһук Илиҥҥи Федеральнай уокурукка бастаан иһэр. Биһиэхэ үлэ киһитэ кыаҕын, эрчимин арыйарыгар усулуобуйа барыта баар. Кэнники сылларга Саха сиригэр экэниэмикэ бары эйгэтигэр үлэ саҥа миэстэтин таһаарарга, үлэһиттэр хамнастарын үрдэтэргэ үгүһү оҥордубут»,- диэтэ кини.
Үлэ киһитин өрө тутуу дьоһун суолталаах. Бу бырааһынньык иннинэ Ил Дархан сыллата ананар “Үлэ киһитэ” бириэмийэтэ 50 бастыҥ үлэһиккэ туттарылынна. Кинилэр сыралаах үлэлэринэн төрөөбүт өрөспүүбүлүкэлэрин сайдыытыгар дьоһун кылааты киллэрдилэр.
«Биһиги Дьокуускай уонна Алдан – үлэ албан аатын сүгэр икки куораттаахпытынан киэн туттабыт. Саха сирин олохтоохторо, биһиги аҕаларбыт уонна эһэлэрбит Аҕа дойду Улуу сэриитигэр дойдубут Кыайыытыгар сүҥкэн кылааты киллэрбиттэрэ, оччотооҕу хас биирдии киһи, бүтүн кэлэктииптэр бэйэни харыстаммат күүрээннээх үлэлэрэ үрдүктүк сыаналаммыта»,-диэтэ.
Иннибитигэр баар бары харгыстары кыайыахпыт уонна эйэлээх үлэбит көмүскэллээх буолуоҕа диэн эрэнэрин туһунан эттэ.
«Быйылгы бырааһынньыкка үлэ кэлэктииптэрин көрсүһүүлэрэ, куонкурустар, култуура тэрээһиннэрэ уонна анал байыаннай дьайыы кыттыылаахтарыгар гуманитарнай акциялар ыытыллыахтара. Дойдубут кэскилин көмүскүүр уустук кэммитигэр биһигиттэн сомоҕолоһуу, тулуур уонна күүрээннээх үлэ ирдэнэр. Күндү доҕоттор! Барыгытыгар чэгиэн доруобуйаны, этэҥҥэ буолууну баҕарабын! Сааскы чаҕыл күн сүргэҕитин көтөхтүн!», — диэн Айсен Николаев түмүктээтэ.
