VIII-c Илиҥҥи экономическай форумҥа Саха сирин Ил Дархана Айсен Николаев өрөспүүбүлүкэ киинэтэ сайдарын туһугар туох үлэлэр ыытыллалларын сырдатта.
«Билигин Саха сирин киинэтэ Россияҕа эрэ буолбакка, аан дойдуга барытыгар улаханнык тарҕанна, дьону сөхтөрдө. Аҥардас киинэ эйгэтин эрэ курдук буолбакка улахан экономика салаата буоларын курдук сайдарын туһугар кэпсэтии бара турар. Биһиги бэрэсидьиэммит Владимир Путин ыам ыйын бүтүүтүгэр тоҕус пууннаах анал уурааҕы таһаарбыта. Онтон икки сорудаҕа Саха сирин кытта чопчу сибээстээх. Бастатан туран, Саха сиригэр үөскээбит “Экстра синема” диэн тыа сиригэр, кыра куораттарга киинэ көрдөрөр бырайыагы Россия үрдүнэн тарҕатарга соруйда. Иккиһинэн, Дьокуускай куоракка толору киинэ оҥорор павильону бу кэлэр сылларга тутарга былааннаата», — диэн Ил Дархан эттэ.
Айсен Сергеевич этэринэн, павильон тутарга сири-уоту быһаарбыттар, билигин бырайыак оҥорорго үлэлииллэр.
