Саха сиригэр потребительскай ырыынакка балаһыанньа чөлүгэр түһэн эрэр. Бу урбааны өйүүр дьаһаллар көмөлөрүнэн ситиһилиннэ.
Бу туһунан Ил Дархан Айсен Николаев «Быһа эфиргэ» иһитиннэрдэ.
«Биллэн турар, биһиги утарсааччыларбыт, араас санкциялары киллэрэннэр, транспортнай-логистическай сыаптар быстыахтара, ас-үөл, туттар табаардар түргэнник бүтэн, дьон долгуйуоҕа диэн санаабыттара буолуо. Ол эрээри кинилэр сыыстылар. Дойду бырабыыталыстыбата кэмигэр сөптөөх быһаарыылары ылыммыта, биһиги эмиэ регионнарга туһааннаах быһаарыылары ылыммыппыт. Биһиги олус тыҥааһыннаахтык үлэлиибит, тоҕо диэтэххэ, кулун тутарга хотугу өттүгэр таһаҕас мунньуллуутун хааччыйыахтаахпыт. Бүгүҥҥү күҥҥэ сыл аҥаарыгар тиийэр сакаастар оҥоһулуннулар, сорох оройуоннарга сүрүн бородууктаҕа сыл бүтүөр диэри тиийэр саппаас баар», — диэтэ Айсен Николаев.
Ил Дархан бэлиэтээбитинэн, үлэ итинэн эрэ түмүктэммэт.
«Биһиги билигин кулун тутарга буолбут сыана ыарааһынын көрбөппүт. Долгуйуу суох, дьон барытын өйдүүр эбит. Ону таһынан аҥардас сыана бэлиитикэтин кэмитиэтигэр суһал линияҕа сыананы чэпчэтэр туһунан 100-тэн тахса этии киирбититтэн, бүтэһик нэдиэлэҕэ 1-2 этии киирбит. Бу аата кыһалҕалар быһаарыллаллар. Биһиги салгыы барытын хонтуруоллуохпут», — диэн Айсен Сергеевич эттэ.
