Россияҕа атырдьах ыйын бастакы баскыһыанньатыгар тимир суол үлэһиттэрин күнэ бэлиэтэнэр.
Саха сирин олохтоохторун, тимир суол үлэһиттэрин бэлиэ күнүнэн Ил Дархан Айсен Николаев эҕэрдэлээтэ.
Саха сирин салалтатын уонна тус бэйэм ааппыттан идэлээх бырааһынньыккытынан итиитик-истиҥник эҕэрдэлиибин!
«Саха сирин тимир суоллара» акционернай хампаанньаҕа 1300-тэн тахса киһи үлэлиир. Кинилэр тимир суол үлэтин, таһаҕаһы уонна дьону таһарга куттал суох буолуутун хааччыйаллар!
Кэнники сылларга тимир суол өрөспүүбүлүкэ тырааныспарын систиэмэтин сүрүн төрдүнэн буолла. Соторутааҕыта эрэ өрөспүүбүлүкэ киин өттүгэр таһаҕаһы эрэ тиэйэр эбит буоллахпытына, билигин Саха сирин олохтоохторо уонна регион ыалдьыттара Аллараа Бэстээххэ диэри айанныыр кыахтаннылар.
Беркакит-Томмот-Дьокуускай тимир суол хайысхатынан таһаҕаһы уонна пассажирдары таһыы кээмэйэ сыллата элбээн иһэр. Аҥардас 2021 сылга 7,5 мөл. туонна таһаҕас тиэйилиннэ, ити 2020 сыл көрдөрүүтүн 26%-нан куоһарда. Оттон пассажирдар ахсааннара былырыын 163,9 тыһыынчаҕа тэҥнэстэ, былаан 187,9% туолла.
Бырамыысыланнас сайдыытынан, саҥа хостонор баайдаах сирдэр аһыллыытынан уонна атын киэҥ хабааннаах инфраструктурнай бырайыактар көмөлөрүнэн ити көрдөрүүлэр улаатан иһиэхтэрэ. «Саха сирин тимир суоллара» сайдыы стратегиятынан сылга 10 мөл. туонна таһаҕас таһыллыаҕа.
Биһиги үлэһиттэрбит төрөөбүт дойдуларыгар олус бэриниилээхтэр. Саха сириттэн Донецкай Норуодунай Өрөспүүбүлүкэҕэ уонна Луганскай Норуодунай Өрөспүүбүлүкэҕэ гуманитарнай таһаҕаһы тиэрдиигэ улахан көмө буолбуттарыгар кинилэргэ махтанабын!
