Саха сирин Ил Дархана Айсен Николаев уонна РФ экономика сайдыытын миниистирэ Максим Решетников «Саюри» хампаанньаҕа уонна «Дьокуускайдааҕы килиэп кэмбинээтэ» тэрилтэҕэ сырыттылар. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Кинилэр хампаанньалар бэрэстэбиитэллэрин кытта билиҥҥи соруктары көрдүлэр, ону тэҥэ судаарыстыба өттүттэн көрүллүөн сөптөөх көмө туһунан кэпсэттилэр. «Саюри» комплекс салалтата үлэтин-хамнаһын туһунан сиһилии билиһиннэрдэ.
«Саюри» аан дойдуга соҕотох тыйыс тымныыны тулуйар теплица буолар, төгүрүк сыл устата оҕурсуну, томаты, баклажаны, күөх оту, клубниканы үүннэрэр кыахтаах. Саҥа технологиялар көмөлөрүнэн сылга ортотунан квадратнай миэтирэттэн 115 киилэҕэ диэри оҕурсуну хомуйар буоллулар, бу дойдуга тепличнай комплекстар орто таһымагар эппиэттиир.
Дьокуускайдааҕы килиэп кэмбинээтэ бэйэлэрин бырайыактарын туһунан сырдатта. Кэмбинээт 2021 сыл алтынньытыгар регион бастыҥ тэрилтэтэ буолбута, «Производительность труда» национальнай бырайыак чэрчитинэн федеральнай компетенциялар кииннэрин өйөбүллэрин ылбыта.
