Бүгүн Ил Түмэн пленарнай мунньаҕар икки норуот дьокутаатын — Александр Иванову уонна Владимир Поскачины — дьокутаат бырааптарын болдьоҕун иннинэ тохтотор боппуруоһу туруорда.
Бу боппуруоска дакылаатынан Саха Өрөспүүбүлүкэтин Ил Түмэнин мандат уонна регламент хамыыһыйатын бэрэссэдээтэлэ Игорь Григорьев тыл эттэ. Кини Иванов уонна Поскачин дьокутаат бырааптарын тохтоторго төрүөт буолбут бигэргэтиллибит элбэх кэһиилэри бэлиэтээтэ.
Александр Иванов сессияҕа сылдьыбата, тоҕо диэтэххэ кини «иноагент» диэн ааттаммытынан сибээстээн хааччахтарга сылдьар. Кини саҥа туруга норуот дьокутаатынан салгыы хааларын бопто.
Санатар буоллахха, Иванов «Новые люди» баартыйа региональнай салаатын хандьыдааттарын испииһэгин састаабыгар талыллыбыта. РФ Юстициятын министиэристибэтин 2026 сыл олунньу 27 күнүнээҕи быһаарыытынан кини омук агеннарын реестрыгар киллэриллибитэ.
Оттон Саха сирин Үрдүкү суута норуодунай дьокутаат Владимир Поскачиҥҥа бобуулаах ботуруоннары харайбытын иһин бириигэбэри бигэргэппитэ. Апелляция холуобунай эппиэтинэстэн дьокутааты босхолуурга төрүөттэри булбатаҕа, балтараа сылга көҥүлүн хааччахтыыр быһаарыныыны хаалларбыта.
