Ил Түмэн дьокутаата Иван Данилов Москваҕа ыытыллыбыт «Наука побеждать» бүтүн дойдутааҕы форумҥа кыттыбыт. Бу форум «Биир ньыгыл Россия» «Zа самбо» бырайыагын чэрчитинэн, Лужники стадиоҥҥа тэриллибит.
Форумҥа регионнарга самбо спорт көрүҥүн сайыннарар туһунан этиилэри билиһиннэрдилэр уонна бу хайысхаҕа бастыҥ көрдөрүүлээх регионнары, ыччаты самбоҕа иитии оруолун, инфраструктураны саҥардыы туһунан ырыттылар.
Баартыйа Генеральнай сүбэтин сэкэрэтээрэ, «Zа самбо» бырайыак уопсастыбаннай сүбэтин бэрэссэдээтэлэ Андрей Турчак бэлиэтээбитинэн, «Биир ньыгыл Россия» самбонан дьарыктаныы киэҥник тарҕанан, баҕалаах киһиэхэ табыгастаах буоларын соруйбут.
«Бу сэлиэнньэ үөрэх тэрилтэлэригэр саалалары арыйыы эрэ буолбакка, анал дыбарыастары, кииннэри, спортивнай эбийиэктэри тутуу туһунан кэпсэтии. Ону тэҥэ, биллэн турар, бу спорт көрүҥэр араас таһымнаах тэрээһиннэри тэрийии туһунан», — диэн Андрей Турчак эттэ.
«Биир ньыгыл Россия» уонна РФ үөрэххэ министиэристибэтэ оскуолаларга физкультура уруогар самбоҕа дьарыктары киллэрии туһунан сүбэлэстилэр. Оттон оскуолалар хапытаалынай өрөмүөннэрин, саҥа оскуола тутуу уонна спортивнай саалалары тупсарыы бырагыраамаларын чэрчитинэн, самбо дьарыгар ордук болҕомто ууруллуоҕа.
«Наука побеждать» форуму түмүктээн, «Zа самбо» баартыйа бырайыагын уонна «Оҕо спорда» координатора Иван Данилов этэринэн, региоҥҥа каадырдар тиийбэттэрин ааҕан туран, учууталлары самбоҕа бэлэмнээһин модулун киллэрэр оруннаах сорук буолар.
«»Биир ньыгыл Россия» норуот бырагырааматын көмөтүнэн Саха сиригэр саҥа оскуолалары тутуу уонна өрөмүөннээһин быыстала суох оҥоһуллар. Оҕо бары өттүнэн сайдыыта биһиэхэ улахан суолталаах. Ону тэҥэ, исписэлиистэри үөрэхтээһин, учууталлар, тренердэр хамнастарын үрдэтэргэ усулуобуйа олохтооһун буолар», — диэн Иван Данилов эттэ.
Сыл устата «Zа самбо» форумнара дойду үрдүнэн ыытыллыахтара. Оттон сэтинньи 16 күнүгэр ,самбо көрүҥ 85 сылыгар анаан «Биир ньыгыл Россия» түмүктүүр форуму Москваҕа тэрийиэҕэ.
