Норуот дьокутааттара алтынньы 27 күнүгэр Ил Түмэҥҥэ 33-с Федеральнай сокуон иитинэн өрөспүүбүлүкэҕэ олохтоох бэйэни салайыныы сокуонун барылын киллэрбиттэрэ. Сокуон барылын сиһилии быһаара, ис хоһоонун арыйа Ил Түмэн спикерэ Алексей Еремеев салайааччылаах дьокутааттар бөлөхтөрө – Андрей Находкин, Олег Марков, Тихон Скрябин, Арассыыйа үтүөлээх юриһа, судаарыстыбаннай уонна бэлитиичэскэй диэйэтэл Макар Яковлев бүгүн илин энэр улуустарга айаннаатылар.
Ахсынньы 17 күнүгэр бэрэстэбиитэллээх уорганнар дьокутааттарын үһүс сийиэһигэр 500-тэн тахса делегат кэлэрэ былааннанар.
«Сийиэскэ Мэҥэ Хаҥаластан 40 дьокутаат куоракка бу тэрээһиҥҥэ талыллан киириэхтээх. Онуоха сокуон барылыгар туох этиилээххитин, көннөрүүлээххитин этэр тоҕоостоох түгэн тохсойор. Бастакы ааҕыыга ылыллыбытын кэннэ бэйэҕит уларытыыларгытын, этиилэргитин Ил Түмэҥҥэ киллэриэххитин сөп. Бу көрсүһүү былдьаһыктаах кэмҥэ буола турар. Ил Түмэҥҥэ бүддьүөтү көрүү кэмин үгэнэ, сөбүлэҥ хамыыһыйаларыгар ханнык хайысхаҕа төһө харчыны тыырабыт диэн көрүү буолар. Эмиэ кэлэр пленарнай мунньахха бүддьүөтү ылыныахтаахпыт», – диэтэ Ил Түмэн спикерэ Алексей Еремеев мунньах саҕаланыытыгар.
Мунньах кэнниттэн Ил Түмэн спикерэ Алексей Еремеев дьон-сэргэ сокуон барылын ылыммытын бэлиэтээтэ.
«Мэҥэ Хаҥаласка буолбут көрсүһүү түмүгүнэн эттэххэ, дьон сокуон барылын ылынна. Боломуочуйа өттүгэр сүрүн уларыйыылары, олохтоох бэйэни салайыныыны икки таһымнаах хаалларын, үөрэҕирии систиэмэтэ улуустарга хаалыахтааҕын, барылга киирбитинэн улуус, нэһилиэк баһылыктарын саҥа ньыманан талар мэхэньиисимнэри сүрүннээн кэпсэттибит. Мунньах кыттыылаахтарыгар махтанабын».
Норуот итэҕэллээхтэрэ илин эҥэр олохтоохторун, дьокутааттарын санааларын, этиилэрин истиэхтэрэ. Салгыы оробуочай сырыы Аммаҕа, Тааттаҕа уонна Чурапчыга салҕаныаҕа.
Хаартыска: Ил Түмэн пресс-сулууспата
