Ол курдук, «Илиҥҥи экономическэй форум-2024» (ВЭФ) сайтыгар толору дьыалабыай бырагыраама таҕыста. Форум балаҕан ыйын 3-6 күннэригэр Владивостокка Уһук Илиҥҥи федеральнай университет кампуһугар ыытыллыаҕа. Тэрийээччи: «Росконгресс» фондата.
Быйылгы ВЭФ сүрүн тиэмэтэ — «Дальний Восток – 2030. Объединим усилия, создавая возможности». Дьыалабыай тэрээһиннэр сэттэ блокка арахсан ыытыллыахтара: «Новые контуры международного сотрудничества», «Технологии независимости», «Финансовая система ценностей», «Россия дальневосточная», «Люди, образование и патриотизм», «Транспорт и логистика: новые маршруты» уонна «Мастер-планы: от архитектуры к экономике».
Ону тэҥэ форум бырагырааматыгар Кытайтан, Индияттан уонна АСЕАН дойдулартан сылдьар урбаанньыттары кытта биисинэс-диалогтар киирсэллэр.
Ону таһынан, ВЭФ саҕаланар күнүгэр норуоттар икки ардыларынааҕы «День сокола» форум иккис төгүлүн ыытыллыаҕа.
Ону таһынан БРИКС дойдуларын инновацияларын форума, норуоттар икки ардыларынааҕы үрдүк үөрэх эйгэтигэр сыһыаннаах АТЭС конференцията уонна инники көлүөнэ күнэ эдэр ыччат бырагыраамата ыытыллыахтара.
Балаҕан ыйын 3-8 күннэригэр Уһук Илин регионнара «Уһук Илин уулуссата» быыстапкаҕа бэйэлэрин ситиһиилэрин үгэс быһыытынан көрдөрүөхтэрэ.
