Бүгүн, муус устар 27 күнүгэр, Саха Өрөспүүбүлүкэтин күнүгэр, СӨ Бырабыыталыстыбатын бэрэссэдээтэлин солбуйааччы Анатолий Семенов былаас уорганнарын, уопсастыбаннас уонна ыччат бэрэстэбиитэллэрин кытта уһулуччулаах судаарыстыбаннай уонна бэлитиическэй диэйэтэл Илья Винокуров пааматынньыгар сибэкки дьөрбөтүн уурда.
«Бу бэлиэ күн биһиги Саха автономиятын төрүттээбит уонна өрөспүүбүлүкэ судаарыстыбаннай диэйэтэллэрин киэн тутта, ытыктабыллаахтык саныыбыт, ааттарын ааттыыбыт. Илья Егорович Винокуров саха норуотун улуу уолаттарын — Максим Кирович Аммосов, Платон Алексеевич Ойуунускай уонна Исидор Никифорович Барахов дьыалаларын салҕаабыта. Кини историята үүнэр көлүөнэҕэ дьиҥ-чахчы патриотизм холобура буолар. Кини аата-суола Саха сирин судаарыстыбаннаһын летопиһыгар уонна норуот сүрэҕэр үйэлэргэ киирдэ», — диэн Анатолий Семенов бэлиэтээтэ.
Тэрээһин иһийии мүнүүтэтинэн түмүктэннэ.
