Искэн ыарыыны кыайбыт уонна онкологическай ыарыылаах оҕолорго көмө оҥорор эдэр блогер Карина Колесова, «Горячее сердце» бүтүн Россиятааҕы көҕүлээһин дипломунан уонна бэлиэтинэн наҕараадаланна. Бу туһунан бириэмийэ сайтыгар таҕыста.
Карина уон саастааҕар «хаан искэннээҕэ» биллибитэ. Ыарыыны утары охсуһуутун кини бэйэтин Instagram-гар @karishka.k.08 диэн аатынан кэпсиир. Бүгүҥҥү күн туругунан, киниэхэ 62 тыһыынчаттан тахса киһи суруттарыылаах.
Балыыһаҕа сыппыт сэттэ ыйын устатыгар кини бэйэҕэ эрэнии уонна ыарыыга бэриммэт буолуу туһунан кэпсээтэ.
2020 сыл атырдьах ыйыгар быраастар искэҥэ ремиссиялаабытын туһунан иһитиннэрбиттэрэ. Бу кэнниттэн икки сыл устата эмтэнэн баран, Карина салгыы оскуолатыгар үөрэнэ барбыта.
Кэлин кини ийэтиниин, олунньу 15-гэр бэлиэтэнэр Аан дойдутааҕы оҕолор күннэригэр ыытыллар «Лучики добра» үтүөнү оҥоруу аахсыйа көҕүлээччилэринэн буолбуттара. Аахсыйа сүрүн ис хоһооно онкологическай балыыһаҕа уһуннук эмтэнэ сытар оҕолорго уонна төрөппүттэргэ наадалаах аһы-үөлү уонна малы-салы хомуйуу буолар.
Карина таһаарыыларын көмөтүнэн, Саха сирин олохтоохторо ыарахан сыаналаах эмтэниини эрэйэр онкологическай ыарыылаах оҕолор баалларын билэллэр. Биирдиилээн дьон уонна хампаанньалар үп хомуйаллар, ыарахан балаһыанньаҕа түбэспит дьиэ кэргэттэргэ тус бэйэлэригэр көмөлөһөллөр.
Карина бэйэтэ ыарыы содулларыттан салгыы эмтэнэ сылдьан блогар бу туһунан суруйар.
Билиҥҥи туругунан, кини бэлиэни тута Москва куоракка айаннаата.
«Маннык улахан суолталаах тэрээһиҥҥэ миигин ыҥырбыттарыттан, быһыым болҕомтото суох хаалбатаҕыттан олус үөрдүм. Бу эһиги өҥөҕүт эмиэ буолар», — диэтэ кини бэйэтин Instаgram-ыгар.
Бүтүн Россиятааҕы «Горячее сердце» көҕүлээһинин бэлиэтинэн, актыыбынай гражданскай быһыыларын көрдөрбүт, дьоҥҥо-сэргэҕэ баҕа өттүнэн көмөлөһөр, эбэтэр кыһалҕалары туораабыт, 23-гэр диэри саастаах эдэр дьон уонна оҕолор наҕараадаланаллар.
