Балаҕан ыйын 24 күнүгэр «Норуоттар сомоҕолоһуулара — Уһук Илин уонна Арктика сайдыытын стратегията» диэн IV Николаевскай форумҥа сайаапкалары биэрии түмүктэннэ. Быйыл тэрээһин аан бастаан регионнар икки ардыларынааҕы таһымҥа тахсар: Карелия Өрөспүүбүлүкэтиттэн, Магадан уонна Сахалин уобаластарыттан, Еврей автономнай уобалаһыттан, Москва куораттан дэлэгээссийэлэр кыттыахтара. Уопсайа 450 кэриҥэ сайаапка киирдэ.
СӨ Ил Түмэнин иһинэн Ыччат парламенын бэрэссэдээтэлэ Айтал Керемясов бэлиэтээбитинэн, былаһаакка уопут атастаһарга уонна бырайыактарынан бииргэ үлэлииргэ дьиҥнээх регионнар икки ардыларынааҕы механиисим буолан эрэр буолан, форум ыччат ортотугар улахан интэриэһи тарта.
«Биһиги сайаапкалары тутууну түмүктээтибит уонна улахан интэриэһи көрдүбүт — түөрт треккэ 435 сайаапка киирбит. Ордук сыаналааҕа диэн, форум аан бастаан өрөспүүбүлүкэ таһыгар тахсар: биһиэхэ дойду атын регионнарыттан дэлэгээссийэлэр холбоһоллор. Бу былаһаакка уопут атастаһарга уонна бырайыактарынан бииргэ дьарыктанарга дьиҥнээх регионнар икки ардыларынааҕы мэханиисим буолан эрэрин туоһулуур. Форум түмүгүнэн биһиги көннөрү идиэйэлэри буолбакка, Уһук Илин муниципалитеттарыгар уонна регионнарыгар олоххо киллэриэххэ сөптөөх бэлэм бырайыактары ылыахпыт», — диэн Айтал Керемясов бэлиэтээтэ.
Сайаапкалар түөрт треккэ арахсаллар: «Бырамыысыланнаска уонна салайыыга эдэр лиидэрдэр» — 152 сайаапка, «Инициатива экэниэмикэтэ: муниципалитеттарга бырайыактары олоххо киллэрии» — 120 сайаапка, «Култууралар икки ардыларынааҕы кэпсэтии уонна социальнай куттал суох буолуута» — 115 сайаапка, «Росмолодежь.Гранты» анал бырагыраама — 48 сайаапка.
Сайаапкалар бүтүн өрөспүүбүлүкэттэн киирдилэр — арктикатааҕы улуустартан соҕурууҥҥу бырамыысыланнас оройуоннарга диэри. Кыттыылаахтар ахсааннарынан Дьокуускай куорат инники күөҥҥэ таҕыста. Улуустар эмиэ көхтөөхтүк кытыннылар: Хаҥалас, Мэҥэ Хаҥалас, Ньурба, Чурапчы, Амма, Уус Алдан, Лиэнскэй, Нүөрүҥгүрү, Нам, Үөһээ Бүлүү, Орто Халыма, Таатта, Бүлүү, Томпо, Мииринэй, Өлүөхүмэ, Кэбээйи, Булуҥ уонна Уус Маайа. Ону тэҥэ Москваттан — дойду киин куоратыгар олорор уонна үлэлиир Саха сириттэн төрүттээх, ону тэҥэ атын регионнартан сылдьар дьонтон сайаапкалар киирдилэр. Бу форум ханна олорортон тутулуга суох саха дьонун түмэр былаһаакка буолан эрэрин бигэргэтэр.
«Росмолодежь.Гранты» грант куонкуруһа форум туспа трегинэн буолла. Муниципалитеттар ыччаттара нэһилиэктэрин уонна куораттарын сайыннарыыга бырайыактары билиһиннэриэхтэрэ. Тэрээһин түмүгүнэн сирдэр соруктарыгар анаан-минээн эппиэттиир көҕүлээһиннэр оҥоһуллуохтара.
Форум бырагырааматыгар стратегическай сиэссийэлэр, үөрэх модуллара, култууралар икки ардыларынааҕы алтыһыы былаһаакката уонна бырайыактары тиһэх көмүскээһин киирэллэр.
Санатар буоллахха, форум балаҕан ыйын 30 күнүттэн алтынньы 2 күнүгэр диэри Хаҥалас улууһун Чапаево сэлиэнньэтигэр ыытыллыаҕа. Форум тэрийээччилэринэн СӨ Ил Түмэнэ, СӨ Ил Түмэнин иһинэн Ыччат парламена уонна СӨ Бырабыыталыстыбата буолаллар.
Форум «Нордголд Менеджмент», Иркутскайдааҕы ньиэп хампаанньата уонна СӨ Инники көлүөнэлэрин пуондата партнерскай өйөбүллэринэн ыытыллар, грант партнера — «Росмолодежь.Гранты».
Хаартыска: Ыччат парламенын пресс-сулууспата
