Кэбээйи улууһун баһылыга Иван Левин Ил Дархан Ил Түмэҥҥэ анал туһаайыытын тутаах түгэннэрин бэлиэтээтэ.
«Айсен Николаев бэйэтин анал туһаайыытыгар бары хайысхалары таарыйар сүдү суолталаах өйөбүл миэрэлэр тустарынан иһитиннэрдэ. Тыа хаһаайыстыбатынан дьарыктанар оройуоннарга, ол иһигэр Кэбээйи улууһугар тыа хаһаайыстыбатын хайысхатын үбүлээһин үрдүүрэ биһигини үөртэ. Анал туһаайыыга баҕа өттүнэн үлэлиир хайысхаҕа өйөбүл көрүллэрин иһиттибит. Бу олус үчүгэй, биһиги оройуоммутугар оҕо тэрилтэлэрэ уонна волонтер хамсааһыннара көхтөөхтүк үлэлииллэр», — диэн кини Telegram-ҥа суруйбут.
Улуус баһылыга этэринэн, Кэбээйи оройуонугар быстах хомуурга ыҥырыллыбыт дьоҥҥо кыраттан саҕалаан улахаҥҥа диэри бэйэлэрин көмөлөрүн тиэртилэр.
«Ааһан эрэр сыл олус уустук диэххэ сөп. Ол да буоллар оройуоҥҥа социальнай эбийиэктэри тутуу, инфраструктура бырайыактарын олоххо киллэрии быстала суох ыытыллаллар. Бүгүҥҥү күҥҥэ биһиги улууспутугар „Үөрэхтээһин“ национальнай бырайыак чэрчитинэн Сайылык сэлиэнньэҕэ 275 миэстэлээх оскуола тутуута салҕанар, Сиэгэн Күөлүгэр быраас амбулаториятын дьиэтэ арылынна», — диэн оройуон баһылыга эттэ.
Батамайга «Төрөөбүт куораппыт уонна сэлиэнньэбит» бырайыагынан уонна «Мин Сахам сирэ-21 үйэҕэ» өрөспүүбүлүкэтээҕи Үтүө дьыала хамсааһынын чэрчитинэн элбэх өҥөлөөх култуура киинэ үлэҕэ киирэри турар.
«„Уһук Илиҥҥэ 1000 тиэргэн“ федеральнай бырайыак чэрчитинэн үс тэлгэһэни тупсарарга үбүлээһин көрүлүннэ. Алта оскуолаҕа хапытаалынай өрөмүөн ыытылынна, Кэбээйигэ уһуйаан бастакы сыбаайата түһэрилиннэ», — диэн Иван Левин бэлиэтээтэ.
Ону таһынан, «Тупсаҕай эйгэни тэрийии» судаарыстыбаннай бырагырааманан Кэбээйигэ Култуура уонна сынньалаҥ пааркатын тутуу үбүлэннэ. ВОЛС ситимигэр хас да сэлиэнньэни холбообуттар.
«Сангаарга аэропорт саҥа дьиэтин тутуута түмүктэннэ. Кэлэр сылга Сангаарга киэҥ бырайыак тутуута саҕаланар — балыыһа комплекса. Инникитин даҕаны биһигини саҥа бырайыактар күүтэллэр, онно Айсен Николаев биллэрбит Үлэ сыла биһиги сүрүн ыйыкпыт буолар. Саҥа сыаллардаах, соруктардаах 2023 сылга түһүнэбит», — диэн Кэбээйи улууһун баһылыга түмүктээтэ.
