Хабаровскай куоракка ыытыллыбыт, 23-гэр диэри саастаах юниордарга ыытыллыбыт көҥүл тустууга Уһук Илиҥҥи федеральнай уокурук чемпионатыгар, Саха сирин сүүмэрдэммит хамаандата кыайыылаах үрдүк аатын ылла. Бу туһунан «Спорт Якутии» иһитиннэрэр.
Ол курдук бөҕөстөр алта кыһыл көмүс, биэс үрүҥ көмүс уонна сэттэ боруонса мэтээллэринэн наҕараадаланнылар. Бириистээх миэстэҕэ тиксибит спортсменнар, быйыл кыһын Кызыл (Тыва) куоракка буолуохтаах Россияҕа бастыыр иһин түмүктүүр күрэхтэһиигэ кыттыахтара.
Бэйэлэрин ыйааһыннарыгар чемпионнарынан буоллулар: Петр Копылов (57 кг), Петр Константинов (61 кг), Кирилл Павлов (65 кг), Петр Герасимов (70 кг), Егор Захаров (74 кг) уонна Никита Хабаров (125 кг).
