Ыам ыйын 10 уонна 11 күннэригэр Кэбээйи улууһун Нидьилитигэр уонна Сииттэтигэр халаан уутун туругуттан ыксаллаах быһыы-майгы эрэһиимин биллэрдилэр.
Ыам ыйын 12 күнүн сарсыардааҥҥы туругунан Чагдаҕа уу таһыма 49 см. тэҥнэһэр. 37 киһи, ол иһигэр уон оҕо олорор алта дьиэни уу ылбыт. Ону тэҥэ, 16 тиэргэҥҥэ уу киирбит.
Сииттэҕэ уу таһыма 210 см тэҥнэһэр, муҥутуур таһым — 167 см. 175 киһи, ол иһигэр 60 оҕо олорор 53 тиэргэҥҥэ уонна биир олорор дьиэҕэ уу киирбит.
Ону таһынан, өрөспүүбүлүкэтээҕи суолталаах «Сииттэ — Баргы» айан суола уонна Синньигэс Атах үрэҕи туоруур муоста ууга барбыт. Түөрт олорор дьиэ гааһын араарбыттар. Ону тэҥэ сэттэ хотон, үс гараж уонна 11 баанньык ууга барбыт. Быстах кэмҥэ олордор пууҥҥа икки улахан киһи уонна 11 ынах сүөһү көһөрүллүбүт.
«Бүгүҥҥү туругунан «Кэбээйи» айан суолун 52, 59, 67 килэмиэтирдэригэр алдьаныылары чөлүгэр түһэрэллэр. Уу таһыма түһэн эрэр. Ааспыт суукка иһигэр Харыйа Үрэх учаастагар региональнай суолталаах «Кэбээйи» айан суолун уу суурайбыт», — диэн этиллэр.
Ыам ыйын 10 күнүттэн оннугар СӨ айан суолларын управлениетын үлэһиттэрэ алдьаныы кээмэйин быһаараллар.
