Кэбээйи улууһугар «Защитники Отечества» пуонда филиалын социальнай координатора Надежда Петрова көмөтүнэн тэрээһиннэр ыытылыннылар.
Ахсынньы 6 күнүгэр гвардия ефрейтора, мотострелковай батальон старшай наводчига, СВО балаһатыгар бойобуой сорудатары толоро сылдьан олоҕун толук уурбут Семён Саввинов кэриэһигэр дартска бастакы аһаҕас турнир буолан ааста. Семен Эдьигээн улууһуттан төрүттээх, Кэбээйи улууһун дьаһалтатыгар үлэлээбитэ.
Турнир аһыллыытыгар тыыл уонна үлэ бэтэрээнэ, Эдьигээн улууһун бочуоттаах гражданина, дьоруой эһэтэ Николай Саввинов видео нөҥүө тыл эппитэ.
Күрэхтэһиигэ Кэбээйиттэн уонна Сангаартан 14 хамаанда кыттыыны ылла. Кыайыыны физическэй култуура уонна спорт управлениетын хамаандата ситистэ, иккис миэстэ 2 №-дээх дьоҕус баһаарынай чаас 4 караула буолла, үһүс миэстэ — Кэбээйи сүүмэрдэммит хамаандата. Ону тэҥэ эр дьоҥҥо уонна кэрэ аҥаардарга бастыыр иһин муҥутуур күрэхтэһии буолла. Манна кыайыылааҕынан Анастасия Мартынова уонна Иннокентий Левин таҕыстылар. Кыттааччылар Семен Саввинов дьиэ кэргэниттэн харчылаах бирииһинэн уонна махтал суруктарынан наҕараадаланнылар.
Аҕа Дойдуну көмүскээччилэр күннэригэр Сангаар бөһүөлэккэ социальнай координатор Надежда Гаврильевна байыаннай дьайыылар бэтэрээнэ Иван Гуляевы Сангаар гимназиятын үөрэнээччилэрин кытта көрүһүннэрдэ.
«Шахтёр» култуура дьиэтигэр байыаннай дьайыылар бэтэрээннэригэр, тыына быстыбыт байыастар дьиэ кэргэттэригэр уонна СВО кыттыылаахтарыгар үөрүүлээх тэрээһининэн түмүктэннэ.
