Петр Киприяновка сырдык тыына быстыбытын кэннэ РФ Дьоруойа үрдүк аатын иҥэрдилэр. Кини Саха сиригэр 11-с Россия Дьоруойа буолла. Өстөөх тирэх пуунугар кимэн киирэргэ байыас хорсун быһыытын мэтээлинэн бэлиэтээтилэр. Бронемассыына эстибитин да кэннэ уонна төһө да ыарахан бааһырыыны ыллар, кини төннөн хаалбакка табаарыстарын иннилэрин хоту илдьибит, миинэлэрдээх сири гранатометтаах ааспыт.
Дойду үрдүнэн дьон-сэргэ 2024 сылы көрсөр кэмигэр Петр Киприянов анал байыаннай дьайыыга барарга быһаарыммыт. Байыас аҕата Александр Петрович ол кэми ахтан-санаан ылла, хайдах Петр хантараак баттыан баҕарбытын туһунан кэпсээтэ.
«Аан бастаан кини хантараак баттыыбын диэн эппэтэҕэ. Толкуйдуур эрэ этэ. Онтон баттаатым диэн биллэрбитэ. Бу кини бэйэтэ ылыммыт быһаарыыта буолан мин хайдах да тохтотор кыаҕым суоҕа», — диэн Александр Петрович эттэ.
«Кини бу бойобуой сыалы-соругу ситиһэн баран уоппускаҕа дьиэтигэр кэлиэхтээх этэ. Уолум бастаан рядовойунан барбыта, онтон младший лейтенант буолбута, ол кэннэ — офицер. Хантараага түмүктэммитин кэннэ дьиэҕэр кэл диэн ыҥырбытым. Ол эрээри офицердар төттөрү төннүбэттэр, анал байыаннай дьайыы түмүктэниэр диэри киирсэбин диэн тылланан сулууспалыы хаалбыта», — диэн аҕата саныыр.
Петр дойдуга бэриниилээх дьиҥ-чахчы дьоруой буолар. Кини 2024 сыл балаҕан ыйыгар олохтон туораабыта. Өрөспүүбүлүкэ баһылыга бэлиэтииринэн, Саха сирэ уонна бүтүн Россия Петр Киприянов хорсун быһыытын хаһан да умнуо суоҕа.
Дьоруой туһунан
Петр Киприянов 1985 сыллаахха алтынньы 6 күнүгэр Хаҥалас улууһун Покровскайыгар төрөөбүтэ. Кыра эрдэҕиттэн кини спорка улахан интэриэстээх эбит, буоксанан дьарыктаммыт. Кыра эрдэҕиттэн барытын интэриэһиргиир, аҕатынаан бултуур уонна мотордаах тыыны ыыта үөрэнэ улааппыт. Кэлин Петр бэйэтэ ыал буолан биэс оҕолоох ыал аҕата.
«Уолум Россия Дьоруойа буолбутуттан олус диэн киэн туттабын. Күүстээх санаалаах, хорсун гына ииппиппиттэн эмиэ киэн туттабын. Ол эрээри…», — төрөппүт оҕото тыына быстыбытыттан аһыйан кыайан салгыы кэпсээбэт.
Хомойуох иһин, Киприяновтар дьиэ кэргэн ийэлэрэ түөрт сыл анараа өттүгэр күн сириттэн барбыта. Аҕалара билигин соҕотох олорор, суоппарынан үлэлиир.
Балтыларын туһунан
Петр ыал улахан оҕото. Кини икки балтылаах — Виктория уонна Елена.
«Биһигини көрөр-истэр үчүгэй убаай этэ. Аҕабыт барыбытын бултуу-алтыы, балыктыы илдьэ барар этэ. Онно Петя биһигини элбэххэ үөрэппитэ: куобаҕы тутарга, саанан ытарга. Кыра сылдьан бары бииргэ атын оҕолору кытта отон, тэллэй хомуйа ойуурга тахсар этибит. Төрөппүттэрбит убаайбытын эрэ кытта ыыталлара. Убаай киһи быһыытынан бу дьыаланы эппиэтинэстээхтик ылсара, барыбытын көрө-истэ сылдьара», — диэн Елена оҕо эрдэҕинээҕитин санаан ылла.
Балтылара убаайбыт куруутун көмүскүө диэн эрэллээх улааппыттар. Кыра сылдьан быракаастаатахтарына да убаайдарыгар эрэнэллэрэ.
«Петя кыылы-сүөлү олус диэн таптыыр этэ. Кыра сылдьан дьиэтэ суох куоскалары тоҥмотуннар диэн техэтээскэ киллэрэн аһатарар этибит. Биһиги элбэх куоскалаах этибит. Ону тэҥэ быраҕыллыбыт ыт оҕолорун эмиэ булан аһатар үгэстээх этибит, кинилэргэ анаан оттон-мастан дьиэ тутааччыбыт», — диэтэ балтыта. «Хас сыллааҕыта эбитэ буоллар… Олох өйдөөбөппүн. Ийэбит биһиэхэ Үөрэх-билии күнүгэр анаан таҥас-сап, мал-сал ылбыта. Сарсыҥҥы күнүгэр биһиги сабыс-саҥа таҥастаах линейкаҕа барыахтаах этибит. Ол эрээри таҥаспытын гудронунан киртитэн кэбиспиппит. Санаатахха маннык кэпсээн элбэх буоллаҕа…».
Балтылара туохтан да куттаммакка дьоллоох буолалларын туһугар Петр Киприянов оҕо сааһыттан кыһаллар этэ. Кинини таптыыр чугас дьоно өрүүтүн саныы-ахта сылдьыахтара.
