СӨ Бырабыыталыстыбатын бэрэссэдээтэлин бастакы солбуйааччы Кирилл Бычков «Звезднай» дьоҕус түөлбэ тутуутун кытта билистэ. Ити тутулла турар дьиэлэргэ хаарбах туруктаах дьиэлэр олохтоохторун көһөрүөхтэрэ.
Ил Дархан Айсен Николаев СӨ Бырабыыталыстыбатын иннигэр бэдэрээччиттэр бары эбийиэктэри сыл бүтүөр диэри үлэҕэ киллэрэллэригэр сорук туруорда.
Пирогов уулуссатыгар 4 №-дээх анал (коррекционнай) уопсай үөрэхтээһин оскуолатыгар 180 миэстэлээх саҥа дьиэ тутуута этэҥҥэ бара турар. Бырайыак быһыытынан 4 966,46 кв. миэтэрэ уопсай иэннээх үс этээстээх дьиэҕэ аныгы үөрэх кылаастара оҥоһуллуохтара, ону тэҥэ актовай уонна спортивнай саалалар, мастырыскыайдар баар буолуохтара. Эбийиэк тутуута 2023 сыл бүтүүтэ түмүктэнэрэ былааннанар.
Хатас сэлиэнньэтигэр 120 миэстэлээх оскуолаҕа эбии тутууну болдьох быһыытынан тута сылдьаллар. Эбийиэк сыбаайаларын түһэрбиттэр. Тутуу үлэтигэр 26 киһи уонна биир тиэхиньикэ кыттар, ону тэҥэ эбии тутуу матырыйаалларын атыыласпыттар. Оскуола эбии тутуута үлэҕэ киирдэҕинэ оҕолор биир сменанан үөрэнэр буолуохтара.
Автодорожнай уулуссатыгар тутулла турар 16 этээстээх элбэх кыбартыыралаах дьиэҕэ алтыс этээс экриннэрин туруорбуттар уонна бу этээскэ билиитэни ууран саҕалаабыттар. Ону тэҥэ эбийиэк ис-тас өттүгэр инженернэй ситимнэри тардыы үлэтэ салҕанар.
«Ильинка» дьоҕус түөлбэ эбийиэгэр бэлэмнэнии үлэтэ ыытыллар: тутуу былаһааккатыгар хаары ыраастыыллар уонна тиэйэллэр, матырыйааллары аҕалаллар.
«Биһиги болдьохтон хаалбат туһуттан үлэни барытын көрөбүт. Ил Дархан туруорбут соругунан үлэ барыта кэмигэр түмүктэниэхтээх. Үлэлэри, ону тэҥэ матырыйааллар хаачыстыбаларын, болдьохторун бэрэбиэркэлииргэ тутуу министиэристибэтигэр соруктары туруордум», — диэн Кирилл Бычков бэлиэтээтэ.
«Звезднай» дьоҕус түөлбэ «Воинскай чаас» кыбаарталыгар үлэ сэттэ эбийиэккэ ыытыллар. Уоту уонна ититиини киллэрбиттэр, кыбартаал иһинээҕи уу ситимин «Водоканал» Ауо оҥорбут. Халлаан сылыйдаҕына ааспыт сылга саҕаламмыт тупсарыы үлэтэ салҕаныаҕа. Үлэлэр 2023 сыл бэс ыйын 30 күнүгэр диэри түмүктэниэҕэ.
