Дьокуускай куорат дьаһалтата кулун тутар 8 күнүгэр оптуобустартан сибэкки атыылыыры бопто. Бу туһунан бүгүҥҥү куораттааҕы планеркаҕа иһитиннэрбиттэр.
Бу көҕүлээһин бырааһынньык күннэргэ сибэккини сокуоннайа суох атыылааһыны тохтоторго уонна бэрээдэги хааччыйыыга аналлаах буолла. Онно анаан мобильнай бөлөхтөр баар буолуохтара. Бу бөлөхтөргө быраап харыстабылын уорганнарын үлэһиттэрэ уонна куораттааҕы сулууспалар үлэһиттэрэ киириэхтэрэ. Кинилэр соруктара — атыы-эргиэн быраабылаларын тутуһууну көрөөһүн, быраабы кэһиини тохтотуу.
Олохтоохтор бырааһынньыктарга сибэккилэри атыылаһалларыгар анаан куорат дьаһалтата урбаанньыттарга атыыга быстах миэстэлэри тэрийэри былаанныыр, холобур, оптуобус сылаас тохтобулларыгар.
