Саха сирин көмө пуунугар Курскай уобалас олохтоохторугар анаан гуманитарнай көмөнү хомуйуу салҕанар.
Ол курдук, бүгүҥҥү күҥҥэ биир туоннаттан тахса көмөнү хомуйдулар. Бу туһунан Биир Ньыгыл Россия Саха сиринээҕи салаатын толорор кэмитиэтин салайааччыта Сулустан Заболоцкай иһитиннэрдэ.
«Саха сирин добровольческай уопсастыбата эмсэҕэлээбиттэргэ куруутун көмөлөһөр. Бу субуотаҕа көмө бастакы баартыйата Курскай уобалас гуманитарнай ыскылаатыгар Москватааҕы Саха сирин бастайааннай бэрэстэбиитэлэстибэтин нөҥүө айанныаҕа», – диэн СӨ тас сибээскэ уонна норуоттар дьыалаларыгар миниистири солбуйааччы Сергей Хатылыков иһитиннэрдэ.
Өрөспүүбүлүкэ улахан тэрилтэлэрэ, ол иһигэр доруобуйа харыстабылын тэрилтэлэрэ көхтөөх кыттыыны ылаллар.
«Медицинэ уопсастыбата Курскай уобаласка буола турар балаһыанньаны кэтииллэр-көрөллөр. Гуманитарнай көмөнү хомуйууга өрөспүүбүлүкэ бары медицинскэй тэрилтэлэрэ кытыннылар. Кылгас кэм иһигэр наадалаах мал-сал хомулунна», – диэн СӨ доруобуйа харыстабылын миниистирин бастакы солбуйааччы Дмитрий Сергин бэлиэтээтэ.
Курскай уобалас олохтоохторун хас биирдии Саха сирин олохтооҕо өйүөн сөп. Онно анаан «Биир ньыгыл Россия» өрөспүүбүлүкэтээҕи баазатыгар күннэтэ гуманитарнай көмө хомуйуута ыытыллар.
Аадырыһа: Дьокуускай куорат, Курашов уул. 24 нүөмэрдээх дь., 405 кэб.
