«Саха сирин амтана» бэстибээл Дьокуускайга сэтинньи 28 күнүттэн ахсынньы 1 күнүгэр диэри буолуоҕа. Манна хоту сир аһын-үөлүн көрдөрүөхтэрэ. Бу туһунан СӨ ыалдьытымсах буолуутун ассоциацията иһитиннэрэр.
Тэрээһин «Кыһын Саха сириттэн саҕаланар» бэстибээл чэрчитинэн ыытыллар.
«Бу куонкуруһунан Саха сирин төрүт омуктарын национальнай аһылыктарын тарҕатар, сөргүтэр санаалаахпыт. Бүлүүдэни барытын төрүт аһылыктан астыахтара», — диэтэ ассоциация бэрэссэдээтэлэ Татьяна Тымырова.
Бэстибээлгэ «Своя компания», «Карлсон», «Крыша», «Муус Хайа», «Река-озеро-лес», «Мясо есть», «Каре», Kitchen, «Тыгын Дархан», «Усадьба Атласовых», «Махтал» о.д.а. кыттыахтара.
Бэстибээл ыҥырыылаах ыалдьыта — биллэр шеф-повар, International del Chef анал аат хаһаайына Рашид Рахманов.
