Улуу Кыайыы 80 сылын көрсө Уус Алдан улууһун Найахы нэһилиэгэр Кыайыы Знамята нэһилиэк устун айанныаҕа.
Бу бырайыагы нэһилиэк «Алгыс» ветеран Сэбиэтин түмсүүтэ олоххо киллэрэн, И.И. Артамонов аатынан Найахы сынньалаҥ киинигэр муус устар 15 күнүгэр үөрүүлээхтик тэрээһин арыллан, нэһилиэк аҕа баһылыгар Петр Слепцовка, бэтэрээннэр Сэбиэтин салайааччытыгар Светлана Петроваҕа туттарылынна.
Бүгүҥҥү тэрээһиҥҥэ сэрии оҕолоро, тэрилтэ салайааччылара, нэһилиэк депутаттара, үһүс саас оскуола кыттыылаахтара, актыбыыстара, оскуола 10 кылааһын үөрэнээччилэрэ кыттыыны ыллылар.
Нэһилиэк баһылыга Кыайыы 80 сылын көрсө Кыайыы Знамята кыттыылаах тэрээһиннэр бүгүн саҕаламмыттарынан, арыллыбытынан биллэрдэ.
Кыайыы Знамята салгыы бизнес инкубатор уонна «Чэчир» оҕо саадын дьиэтигэр айаннаата.
Муус устар 18 күнүгэр Знамя салгыы 8-с нүөмэрдээх Баһаарынай чаас дьиэтигэр хаамыаҕа.
