Алтынньы 22 күнүгэр Өлүөхүмэ аэропордун үлэтэ сөргүтүлүннэ. Инники сөмөлүөт көтөн тахсар балаһата илийэн, үс нэдиэлэ кэриҥэ аэропорт үлэтэ тохтоон турбут.
«Бүгүн алтынньы 22 күнүгэр икки Ан-24 сөмөлүөт Өлүөхүмэттэн Иркутскайга көттүлэр», — диэн «Аэропорты Севера» Өлүөхүмэтээҕи салаатын дириэктэрэ Владимир Разинков кэпсээтэ.
Бүгүн киэһэ олохтоох бириэмэнэн 22.00 чаас кэнниттэн, икки сөмөлүөт көтөн кэлиэхтээх. Алтынньы 23 күнүттэн аэропорт сүрүн араспысаанньанан үлэтин салҕыа.
Күн-дьыл туругун кэтээн көрөөччүлэр сабаҕалыылларынан, күнүс салгын температурата -1-2 кыраадыс буолара күүтүллэр. Онон маннык кыһалҕа хатыланыа суоҕа диэн эрэнэллэр.
Инники этиллибитинэн, бүтэһик сөмөлүөт алтынньы 4 күнүгэр кэлэн түспүт, ол кэнниттэн аэропорт бөртөлүөттэртэн ураты атын көтөр суудуналарга сабыллыбыт.
