Өлүөхүмэ улууһугар анал байыаннай дьайыыга өлбүт байыастары кэриэстээтилэр, онно СӨ баһылыга Айсен Николаев мемориальнай дуоскаҕа сибэкки уурда.
Мемориалы СӨ ГУП «ОДьКХ» филиала Александр Добриновка уонна Александр Петровскайка анаан туруорбуттар.
«Бүгүн биһиги дойдубутун көмүскээри олохторун биэрбит дьоруойдары кэриэстээри түмүстүбүт. Биһиги дьоруойдарбыт ааттарын үйэтитэр туһугар үлэлиэхпит. Өлүөхүмэтээҕи филиалга көҕүлээһиннэрин иһин махтанабын. Дьоруойдарбыт дьиэ кэргэттэригэр көмөлөһүөхпүт, өйүөхпүт. Биһиги кэлэр кэнчээрибит сырдык, эйэлээх халлаан анныгар олорорун туһугар хайаан да кыайыахпыт. Дьоруойдарбыт албан ааттара үйэлэргэ умнуллубатын», – диэн Ил Дархан Айсен Николаев эттэ.
Александр Добринов өрөмүөннүүр инженеринэн, Александр Петровский – суоппарынан үлэлээбиттэр. Кинилэр иккиэн Өлүөхүмэттэн төрүттээхтэр, 2022 сыл балаҕан ыйыгар дьоҕус хомуурга хапсан сулууспалыы барбыттар.
«Александр Добринов уонна Александр Петровский биһиги эрэллээх доҕотторбут этилэр. Кинилэр бэйэлэрин олус эппиэтинэстээх исписэлиис быһыытынан көрдөрбүттэрэ. Уолаттар ытык иэстэрин толордулар. Инники көлүөнэ кинилэри өйдүүрүн уонна киэн туттарын курдук өйдөбүлү олохтуохпут», – диэн тэрилтэ генеральнай дириэктэрин солбуйааччыта Дмитрий Антонов эттэ.
