Өлүөхүмэ куоратыгар Өлүөнэ өрүс уутун таһыма кутталлаах кирбииттэн аллараа түстэ. От ыйын 22 күнүн 12:00 чаастааҕы туругунан, уу таһыма 1041 см тэҥнэспит, ааспыт аҕыс чаас устата 31 см намтаабыт (кутталлаах кирбии — 1060 см). Бу туһунан СӨ Гражданскай көмүскэлгэ министиэристибэтэ иһитиннэрдэ.
Өлүөхүмэ оройуонугар балаһыанньа тупсан эрэрин үрдүнэн, халаан содула баар. Ууга барбыт тиэргэн ахсаана 32-гэ тэҥнэһэр, ол иһигэр биир олорор дьиэ.
Саха сирин үгүс өрүстэригэр уу таһыма араастаан хамсыыр. Сорох учаастактарга уу түһэ турар буоллаҕына, өрөспүүбүлүкэ киин өттүгэр уу таһыма үрдүүрэ бэлиэтэнэр.
Хаҥалас улууһугар Иһит сэлиэнньэтин аттыгар уу таһыма 12 чаас иһигэр 3 см түһэн 1598 см тэҥнэспит, бу кутталлаах кирбииттэн быдан намыһах. Оттон Покровскай куоракка, төттөрүтүн, уу тахса турар: таһыма 829 см тиийдэ, 12 чаас устата 20 см эбилиннэ, ол эрээри кутталлаах бэлиэҕэ диэри лаппа ыраах.
Дьокуускай куорат уокуругар Өлүөнэ өрүскэ уу таһыма салгыы үрдүүр. Киин куоракка суукка иһигэр уу 73 см эбиллэн 562 см буолла (кутталлаах кирбии — 827 см). Табаҕаҕа суукка устата 61 см эбиллэн 867 см тиийдэ, Пригороднай дьоҕус оройуоҥҥа 12 чаас иһигэр 17 см эбиллэн 829 см буолла, Кангаласска — 800 см тиийдэ, бу иннинээҕи сууккаттан 75 см үрдүк. Бары гидропостарга уу таһыма кутталлаах кирбииттэн намыһах.
Бүлүү өрүскэ Сунтаар улууһугар уу таһыма түһэ турар. Ол да буоллар, ууга барбыт тиэргэн ахсаана 150-ҥэ тэҥнэһэр, ол иһигэр 76 олорор дьиэ баар, манна 498 киһи, ол иһигэр 142 оҕо олорор. Халаантан сылтаан Кэмпэндээйи, Туойдаах (Толстой) уонна Тэҥкэ бөһүөлэктэргэ массыына сырыыта харгыстанна.
Эбээн Бытантай улууһугар эмиэ уу сыыйа түһэр. Баатаҕай Алыыта сэлиэнньэтигэр түөрт чаас иһигэр уу 16 см түспүт, ол эрээри икки тиэргэн ууга сытар. Тиэхиньикэ тохтуур сиригэр уонна «Саккырыыр» аэропорду уматыынан хааччыйар ыстаансыйа сиригэр-уотугар уу киирбит. Кустуур сэлиэнньэтигэр түөрт чаас иһигэр уу 7 см түспүт, кутталлаах бэлиэҕэ диэри 80–90 см курдук хаалбыт. Манна 22 тиэргэн ууга барбыт, оттон быстах кэмҥэ олордор пууҥҥа 27 киһи, ол иһигэр 12 оҕо баар. Дьарҕаалаахха түөрт чаас иһигэр уу таһыма 20 см намтаабыт.
Хаартыска: «Саха» НКИХ
