Өлүөхүмэ Н.Н. Яковлев аатынан 1 №-дээх орто оскуолатын үөрэнээччитэ Валерия Емельянова International Avicenna Youth Science Fair-2021 норуоттар икки ардыларынааҕы конференцияҕа боруонса мэтээли ылла. Бу туһунан НКИХ «Саха» иһитиннэрэр.
Конференцияҕа Валерия «Динамика осенних фенологических явлений по территории Якутии» диэн дакылааты көмүскээтэ. Научнай салайааччыта — Ольга Рожкова, Өлүөхүмэ оройуонун үөрэнээччилэрин айар уонна гуманитарнай үөрэҕирии киинин дириэктэрэ, биологическай наука кандидата.
Валерия Владивостокка «Океан» лааҕырга баран сынньаммыт. Онно сылдьан олус элбэх дьону кытта билсибит, билиитин хаҥаппыт.
«Лааҕыр сылдьан араас бырайыактары оҥорбуппут. Барыта олус интэриэһинэй этэ. Ол кэмҥэ миигин IAYSF-2021 конференцияҕа кыттаҕын диэбиттэрэ. Салайааччыбын кытары кэпсэтэн, бэлэмнэммитим. Киэҥ эйгэ ситиһиилээхтик кытынным», — диэн Валерия эттэ.
Валерия науканан дьарыктаммыта номнуо үс сыл буолбут. Оскуоланы бүтэриэр диэри талбыт тиэмэтин чиҥэтэн, чинчийэр үлэни ыытан, ырытар кыаҕын кэҥэтэр былааннаах.
«Үһүс миэстэ буолбуппуттан олус үөрэбин, салайааччыбар, миэхэ көмө буолбут дьоҥҥо махтанабын. Салгыы тиэмэбин сайыннаран, кэҥэтэн биэрэр соруктаахпын», — диэтэ Валерия Емельянова.
