Өлүөнэ өрүһү уҥуордуур муоста сыанатын бырайыак судаарыстыбаннай экспертизаны ааспытын кэнниттэн быһаарыахтара. Бүгүн, олунньу 25 күнүгэр, Ил Түмэҥҥэ бу туһунан кэпсэттилэр.
«Бырайыак аныгы технологияны туһанан 2024 сылга диэри магистральнай инфраструктураны сайыннарыы, кэҥэтии былааныгар олоҕуран оҥоһулунна», — диэтэ вице-премьер Кирилл Бычков.
Бырайыак докумуона быйыл чааһынай инвестор суотугар оҥоһуллуоҕа, оттон 2021 сыл бастакы аҥарыгар судаарыстыбаннай экспертизаны ааһыаҕа. Салгыы 2021-2025 сылларга муостаны тутуохтара.
Санатан эттэххэ, Ил Дархан Айсен Николаев бэрэсидьиэн Владимир Путиҥҥа суруйбут суругар олоҕуран, муоста федеральнай бырагыраамаҕа киирбитэ.
