Быйыл «Өлүөнэ очуостара» айылҕа паарката уруккутааҕар икки ыйынан эрдэ үлэлээтэ. Бу туһунан тэрилтэ пресс-сулууспата иһитиннэрэр.
Дириэктэр Аркадий Семенов этэринэн, үгэс быһыытынан тохсунньуга эбэтэр олунньуга кыһыҥҥы сезон арыллар эбит.
«Ахсынньы 2 күнүттэн ыла ыалдьыттар Батамайга сынньана кэлиэхтэрин сөп, онтон сатыы эбэтэр буранынан Өлүөнэ очуостарыгар диэри айанныахтарын сөп. Сэрэтэбин: бу сырыы «Батамай – Лабыдьа» кыһыҥҥы суол арыллыар диэри үлэлиир», — диэтэ кини.
Батамайтан Лабыдьаҕа диэри сатыы 15-25 мүнүүтэ сатыы хаамыахха сөп, буранынан дьону «Өлүөнэ очуостарын» үлэһиттэрэ эбэтэр олохтоох таһааччылар таһаллар.
«3-4 киһилээх буранынан айан сыаната 2 400 солкуобай. Өссө биирдэ этэбин: ити сыана хас биирдии киһиттэн буолбатах, барыларын киэнэ итиччэ буолар. Туристар хплыҥнык таҥнаргыт ирдэниллэр», — диэтэ Аркадий Семенов.
Кыһыҥҥы айан суолун тохсунньу ортотугар арыйыахтара. Паарка дириэктэрэ этэринэн, өрөспүүбүлүкэҕэ туризм эйгэтэ сайдыбытынан сибээстээн сезону эрдэ арыйарга быһаарыы ылыныллыбыт.
«Өлүөнэ очуостарыгар» киирии билиэтин сыаната МРОТ кээмэйэ улааппытынан 50 солк. үрдээбит.
