Өлүөнэ өрүс уутун таһыма тахсан муус үрдүнэн айан сырыыта уустугурда

«Умнас» 12-с км — Хатас — «Лена» 1154 км» айан сырыыта өрүс уутун таһыма тахсыбытыттан уустуктардаах буолла.
«Өлүөнэ өрүс нөҥүө кыһыҥҥы айан суолун Дьокуускай уонна Мэҥэ-Хаҥалас икки ардынан оҥороллор. Ол иһин Үөс-Кумах арыыга 6 км. усталаах айан суолун оҥорор улахан массыыналар сырыылара хааччахтанна. Өрүс уҥа кытылыгар эмискэ уу элбээбит», — диэн суол управлениетын пресс-сулууспата иһитиннэрэр.
Билигин ууну аһардар турбалары уонна инертнай матырыйааллары эбии киллэриэхтээхтэр. Үс тоннаҕа диэри ыйааһыннаах массыына сырыыта ахсынньы 10 күнүттэн көҥүллэнэр болдьоҕо өссө уһуон сөп.
Суоппардарга ситэ тоҥо илик муус үрдүнэн айанныыртан туттунарга сүбэлииллэр.