Уһук Илиҥҥэ аан бастакы «Үлэ кыбаартала» креативнай кластер эһиил Дьокуускайга арыллыаҕа. Билиҥҥи туругунан резиденнээһиҥҥэ 70-тан тахса киһи дуогабардаста. Бу туһунан Ил Дархан пресс-конференцияҕа иһитиннэрдэ.
«Биһиги айтишниктарбыт аан дойдуну баһылыахтарын наада. Үтүө холобурдар бааллар — «Индрайвер», «Майтона». Аны билигин «Фнтастик» түргэн тэтимнээхтик сайдан иһэр», — диэбит кини.
2024 сылга IТ-эйгэтигэр уон тыһыынчаттан тахса киһи үлэлиир буолуохтаах. Онон 2023 сыл бүтүөр диэри ХИФУ, сайдыы институттарын, наука тэрилтэлэрин уонна бырамыысыланнас хампаанньаларын күүстэрин Инновационнай наука-технология киинигэр түмүөхтэрэ.
Ону кытта Биотехнологическай киин тэриллиэҕэ, регенеративнай медицина, клеточнай технология, биоинформатика, тыа хаһаайыстыбатын биотехнологиятын эйгэтигэр үлэлиэхтэрэ.
IТ-стартаптар Саха сирин инновацияҕа сайдыытыгар пуондатын «Б8» акселераторыгар кыттыахтарын cөп. 55 кыттааччыттан 37 бырайыак өйөбүлү ылбыт. Саха сирин уонна Хабаровскай, Улан-Удэ, Владивосток бырайыактара киирбиттэр. Эһиил сүүрбэттэн итэҕэһэ суох бырайыагы өйүүр санаалаахтар.
Билигин 13 оройуоҥҥа IТ-киин баар. Сыл бүтүөр диэри Үөһээ Дьааҥыга арыллыаҕа. Аны икки сылынан өссө 17 киин арыллыахтаах.
2021 сыл бүтүүтэ Арктическай стартап-экспедиция саҕаланыа. Россия, Финляндия, Швеция, Норвегия, Дания, Канада, Исландия, АХШ арктическай дойдуларын олохтоохторо уопут атастаһыахтара, уопсай бырайыактары оҥоруохтара. Экспедиция 2022 сыл бүтүөр диэри буолуоҕа.
