Тохсунньу 21 күнүгэр Ленскэйгэ бэйдиэ сылдьар ыттар боппуруостарынан уопсастыбаннай көрсүһүү буолан ааста. Олохтоохтор ыттар оҕоҕо саба түһүүлэрин кэнниттэн миэрэ ылары ирдээтилэр.
Көрсүһүү түмүгүнэн көрүүтэ суох сылдьар ыттар боппуруостарынан дьарыктанар уопсастыбаннай инициативнай бөлөх тэрилиэҕэ. Полиция үлэһиттэригэр оҕону ытырбыт ыттар хаһаайыннарын эппиэтинэскэ тардарга этилиннэ.
Ленскэй куорат дьаһалтата олохтоохтору итинник түгэнтэн көмүскүүр үлэни ыытар уонна көрүүтэ суох ыттар боппуруостарын быһаарар испэсэлииһи аныыр туһунан сорук ылынна.
Аны маннык көрсүһүү биир ыйынан хаттаан ыытыллыаҕа.
Тохсунньу 20 күнүгэр 15 бэйдиэ сылдьар ыт үөрэ саба түһүүлэригэр эмсэҕэлээбит оҕону Дьокуускайга санавиациянан аҕаллылар. СӨ доруобуйа харысытабылын министиэристибэтэ оҕо ыарахан туруктааҕын бэлиэтиир.
