Россия наукатын академиятын Сибиирдээҕи салаатын биолог учуонайдара Ленскэй оройуонун дьиикэй кыылларын сөмөлүөтүнэн ааҕыыны ыыталлар. Бу туһунан Лэнскэй оройуон дьаһалтатын пресс-сулууспата иһитиннэрэр.
«Биһиги билигин ньиэп хостуур хампаанньалар кэлиилэринэн сибээстээн, кыыллар ахсааннара аҕыйаабыт дуу, суох дуу диэн, ону тэҥэ оройуоҥҥа туох буола турарын туһунан чахчы хартыынаны билиэхпитин баҕарабыт. Маны таһынан кыыл көһүүтүн кэтиэхпит. Бу көрдөрүүлэри кэлин сири байытар тэрилтэлэри кытта үлэҕэ туһаныахпыт», — диэн Ленскэй оройуон баһылыга Жумарт Абильманов кэпсээтэ.
Дьиикэй кыыллары ааҕыы туспа ньыманан ыытыллар: сөмөлүөт сиртэн 100 миэтэрэттэн намыһах үрдүгүнэн, чааска 100-120 килэмиэтир түргэннээх көтүөхтээх.
