2022 сылтан Ленскэй оройуонугар саҥа үлэһиттэри аҕаларга «Земскэй учуутал» федеральнай бырагыраама үлэлиир. Бырагыраама кыттааччылара оройуоҥҥа кэлэллэригэр олохтоох бүддьүөттэн 1 мөлүйүөн солкуобайы ылыахтарын сөп. Бу туһунан оройуон дьаһалтатын пресс-сулууспата иһитиннэрэр.
Ленскэй оройуон үөрэҕин дьаһалтатыгар бырагыраамаҕа кыттыан баҕалаахтартан сайаапкалары муус устар 12 күнүгэр диэри хомуйуохтара. Бырагыраамаҕа кыттарга билиҥҥитэ биир эрэ сайаапка киирбит, ол иһин болдьоҕу уһатыахтарын сөп.
Бырагыраама Ленскэй оройуонун үөрэх тэрилтэлэригэр үлэһиттэри элбэтэргэ ананар. Билигин оройуоҥҥа үөрэх эйгэтигэр 50-чэ вакансия баар.
«Учууталлары тардыыга саҥа бырагыраама оройуон бүддьүөтүттэн 1 мөлүйүөн солкуобай биир кэмнээх төлөбүрү көрөр, бу харчыны ханнык баҕарар наадаҕа туһаныахха сөп. Оройуоҥҥа үрдүк таһымнаах идэтийбит исписэлиистэр тиийбэттэр, манна саҥа үлэһиттэри 50 сааһыгар диэри ылабыт. Биһиги бу бырагырааманан сыллата 10-ча киһини үлэҕэ ылар кыахтаапыт. Кыттааччы Ленскэй оройуонун үөрэҕин тэрилтэлэригэр 5 сылтан итэҕэһэ суох үлэлиэхтээх», — диэн оройуон үөрэҕин управлениетын салайааччыта Изумира Корнилова эттэ.
