«Саха» национальнай көрдөрөр-иһитиннэрэр хампанньа быйылгыттан уһулуччулаах телевизионнай режиссер, СӨ култууратын туйгуна, суруналыыстыкаҕа Судаарыстыбаннай бириэмийэ лауреата Лидия Михайловна Васильева сырдык аатын үйэтитэр сыалтан бириэмийэни туттарар буолла.
Ол курдук, 2025-2026 сс. телерадиосезон түмүгүнэн бастыҥ бырайыагы оҥорон таһарыыга Лидия Васильева аатынан бириэмийэ бастакытын «Саха» НКИХ сериал сулууспатын редактора Октябрина Шестаковаҕа туттарылынна. Кини сценарийдарынан ааспыт сезоҥҥа «Айкуо» сериал көстүбүтэ уонна «Омоон суоллар.Искупление» толору кээмэйдээх киинэ уһуллубута. Октябрина маны сэргэ киинэ уһуллуутугар продюсерынан үлэлэспитэ.
«Дэгиттэр талааннаах режиссербут, саха телевидниетыгар үйэ аҥарыттан ордук эҥкилэ суох үлэлээбит, сахалыы аан маҥнайгы «Ыаллыылар» сериал ааптара — Лидия Михайловна Васильева сырдык аатыгар олохтоммут бастакы бириэмийэтин тутаммын олуһун долгуйдум уонна үөрдүм. Хас да сыллааҕыта, бүтэһик көрсүһүүбүтэр Лидия Михайловна «Октя маладьыас, сценарист буолбут эбиккин дии, кытаат! Все когда-то случается впервые» диэн күлбүтэ харахпар көстөн кэлэр. Билигин айар үлэбэр убастыыр, холобур оҥостор аҕа коллегабыттан, Лидия Михайловнаттан алгыс ылбыт саҕа сананным. Салайаччыларбар, үлэбин үрдүктүк сыаналаабыккытыгар, махтанабын!», – диэн Октябрина Шестакова эттэ.
Лидия Васильева аатынан бириэмийэ телевизионнай сезон түмүгүнэн үрдүк көрдөрүүлээх үлэһиккэ сыл ахсын туттарыллар гына олохтонно.
