И.Г. Тимофеев аатынан Майа лицейин иһинэн, «Сайдыс» оскуола саҥа технопаркатын үөрүүлээх аһыллыыта буолла. Бу туһунан үүнэр көлүөнэ пуондатын пресс-сулууспата иһитиннэрэр.
Лицей дириэктэрэ Татьяна Попова кэпсээбитинэн, аҕыс сыл анараа өттүгэр лицейгэ оскуола оҕолоругар техническэй хайысхалаах куруһуок арыйбыттар.
«Билигин үүнэр көлүөнэ пуондатын өйөбүлүнэн ыра санаабытын олоххо киллэрдибит уонна саамай аныгы оборудованиелаах технопарканы арыйдыбыт. Үөрэнээччилэргэ идэҕэ туһаайыылаах үлэни күүһүрдэргэ көмөлөһүөҕэ. Маннык усулуобуйаҕа биһиги оҕолорбут уонна учууталлар саамай хорсун толкуйдарын, бырайыактарын олоххо киллэрэр кыахтаныахтара», — диэтэ кини.
Технопаркаҕа улахан кыамталаах компьютернай тиэхиньикэни туруордулар, лазерынан үлэлииргэ аналлаах туруорууну, Лего уонна робототехника дьарыгар аналлаах конструкцияны, 3-D моделированиеҕа туһаныллар оборудованиены, квадракоптердары ыллылар.
Үүнэр көлүөнэ пуондатын генеральнай дириэктэрэ Владимир Егоров бэлиэтээбитинэн, Ил Дархан Айсен Николаев дьаһалынан, 2024 сылга диэри хас биирдии муниципальнай тэриллиигэ уонна куорат уокуругар оҕо технопаркалара тэриллиэхтэрэ.
«Өрөспүүбүлүкэҕэ эрдэтээҥи уонна бары өттүнэн сайдыы сүрүннээччитин быһыытынан, пуонда судаарыстыба, муниципальнай тэриллии уонна урбаан кыттыылаах олоххо киирэр көҕүлээһиннэри өйүүр. Оҕо технопаркаларын, цифровой үөрэх уонна да атын инновационнай кииннэр ситимнэрин кэҥэтии өрөспүүбүлүкэҕэ, ол иһигэр тыа сиригэр эмиэ киэҥ хабааннаах буолуоҕа. Бу аныгы экономикаҕа идэтийбит каадырдары бэлэмниир систиэмэни тэрийии биир сүрүн усулуобуйата», — диэн кини тоһоҕолоон бэлиэтээтэ.
Бу пуонда «Оҕо инновационнай кииннэрэ» саҥа бырайыагын чэрчитинэн тэриллибит бастакы технопарката буолара бэлиэтэнэр. Бырайыак «АЛРОСА» АХ үбүн суотугар 2021-2023 сылларга «Во имя будущего» туһуламмыт бырагырааманан олоххо киирэр.
