Мэҥэ Хаҥалас улууһун Майа сэлиэнньэтин депутаттара сиэссийэнэн бигэргэппит быһаарыныылара Ил Түмэн Судаарыстыбаннай мунньаҕар сокуонунан бигэргэтилиннэҕинэ Майаҕа маҕаһыыннар аһыы утаҕы атыылыыллара бобуллуоҕа.
Оччотугар тыа сирин биир саамай элбэх нэһилиэнньэлээх Майа сэлиэнньэтэ чөл олохтоох сэлиэнньэ статуһун ылыннаҕына, атыттарга үтүө холобур буолар уопутун атын регионнарга тарҕатар кыахтанар.
Күн бүгүн Саха сиригэр уопсайа 205 чөл олохтоох нэһилиэк баара биллэр. Бу күннэргэ Майа сэлиэнньэтин олохтоох салалтата, уопсастыбаннаһа кыттыылаах «Трезвое село» бырайыак тула кэпсэтиигэ Саха сиригэр чөл олоҕу тарҕатыыга үлэлэһэр Матвей Лыткин уонна Москва куораттан «Комсомольская правда» хаһыат суруналыыһа Григорий Кубатьян ыалдьыттаан олохтоохтору кытары көрсөн, кэпсэтэн анал репортаж оҥорорго матырыйаал хомуйдулар.
