Ахсынньы 7 күнүгэр, Саха сиригэр «омикрон» штаммнаах ыарыы тарҕаммыт дойдуларыттан кэлбит дьон суох.
Бу туһунан СӨ Роспотребнадзор салайааччыта Маргарита Игнатьева иһитиннэрдэ.
«Өрөспүүбүлүкэтээҕи Роспотребнадзор управленията уонна СӨ Доруобуйа харыстабылын министиэристибэтэ саҥа коронавируснай инфекцияны бэлиэтииргэ бары схемалары, алгоритмнары үлэлэттибит. Лабораторнай чинийиилэри ыытарга диагностикумнар, тест-систиэмэлэр бааллар, ол иһигэр «Экспресс-ВАК SARS-CoV-2-ИХА», эмтэр, обсерватордар бэлэмнэр», – бэлиэтээтэ Маргарита Игнатьева.
Саха сирин кылаабынай санитарнай бырааһа быһаарбытынан, Соҕуруу Африкаттан эбэтэр Африка континенын дойдуларыттан, Гонконгтан кэлбит дьон 14 күн булгуччу киириэхтээхтэр. 14 күн устата иккитэ лабораторнай чинчийии ыыталлар – бастакы 48 чаас устата уонна изоляция 10-12 күннэригэр.
«Дьокуускай куоракка бу ыйыллыбыт дойдулар рейстэрин толорбот. Онуоха бу дойдуттан кэлбит пассажирдар тустарынан иһитиннэрии Роспотребнадзор Саха сиринээҕи управлениетыгар Роспотребнадзор санитарнай-карантиннай хонтуруол пуунуттан — Москва, Санкт-Петербург, Новосибирскай уо. д. а. аэропорттартан киирэр. СӨ тас сибээскэ уонна норуоттар дьыалаларыгар министиэристибэтэ, СӨ ИДьМ миграционнай сулууспата уонна атын да уорганнара уонна биэдимэстибэлэрэ ылыллыбыт анкета дааннайдарынан дьону түргэнник булан, сөптөөх дьаһаллары, дьаҥ утары тэрээһиннэри кэмигэр ыытыллыаҕа», – кэпсээтэ Маргарита Игнатьева.
