Бүгүн, муус устар 9 күнүгэр VIII-с «Азия оҕолорун» оонньууларыгар бэлэмнэнии чэрчитинэн «Матч ТВ» ханаал бэрэстэбиитэллэрэ «Саха»НКИХ режиссердарыгар, телеоператордарыгар уонна звукорежиссердарыгар анаан семинар ыыттылар.
«Матч ТВ» ханаалы кытта уруккуттан үлэлэһэбит. «Азия оҕолорун» оонньууларын бродкастера буолуохпутуттан, бэйэбит үлэһиттэрбитин хаста да Москваҕа командировкалыы сырыттыбыт. Онно баран кинилэр улахан трансляцияларга үлэлээн, улахан трансляциялары хайдах ыыталларын көрөн, элбэх уопуту ыллылар. Быйыл сайын буолаары турар «Азия оҕолоругар» хампаанньабыт бары кэриэтэ үлэһиттэрэ үлэлиэхтэрэ. Ону барыларын командировкалыыр кыахпыт суох буолан, «Матч ТВ» хамаандатын Дьокуускайга кэлэн үөрэтии ыыталларыгар көрдөспүппүт. «Матч ТВ» сүрүн хамаандата Петр Дмитриев, Алексей Маженков уонна Станислав Хитрин кэлэн үс бөлөҕүнэн күүскэ үөрэтэ сылдьаллар. Үөрэх семинар эрэ курдук буолбакка, практикалаах — бу өрөбүлгэ улахан күрэхтэһиини устуу ыытыллыаҕа. Ону тэҥэ «Азия оҕолорун» оонньуулара ыытыллар бары эбийиэктэрин көрөн камералар хайдах үлэлиэхтээхтэрин, хантан устуохтаахтарын, трансляция хайдах буолуохтааҕын миэстэтиттэн быһаарсыы ыытыллыаҕа. Бу үөрэхтэн биһиги элбэҕи күүтэбит, кэтэһэбит уонна бастатан туран «Азия оҕолорун» сырдатарбытыгар төһүү күүс буолуоҕа диэн эрэнэбит», — диэн «Саха» НКИХ генеральнай дириэктэрэ Олег Марков бэлиэтээтэ.
«Бастакытын эһиги хампаанньаҕыт маннык халыҥ хамаандатын кытта көрүстүм. Бэйэм быһаарсар уонна «Азия оҕолорун» оонньууларын бырагырааматыгар киирбит көрүҥнэр тустарынан билэрбин барытын кэпсии сатаатым. Тоҕо диэтэргин хас биирдии спорт көрүҥэр болҕомтону тардар ураты өрүттээх уонна түгэннээх. Семинарбыт олус таһаарыылаахтык уонна көхтөөхтүк ааста, үс чаас ааспытын билбэккэ да хааллым. Маннык үөрэххэ теория эрэ буолбакка, практическай чаастааҕа үчүгэй», — «Матч ТВ» спортивнай трансляцияларын сүрүн режиссера Станислав Хитрин кэпсээтэ.
«Звукорежиссердар тыаһы-ууһу музыкальнай да өттүттэн, техническай да өттүттэн үчүгэйдик билиэхтээхтэр. Тоҕо диэтэргин кинилэр кулгаахтарынан көрөөччү заалга туох баар буола турарын барытын истэллэр. Маннык семинардар ыыттыллаллара наһаа үчүгэй, хас биирдии киһи саҥаны билэр. Маннык үөрэҕи атын да ханаалларга куруук ыыта туруохха наада дии саныыбын, үчүгэй уопут атастаһыыта», — диэн «Матч ТВ» спортивнай трансляцияларын дирекциятын сүрүн звукорежиссера Алексей Моженков санаатын үллэһиннэ.
Сэминар иитиинэн теоретическай үөрэтии, «Азия оҕолорун» оонньууларын кэмигэр трансляциялар ыытыллар эбийиэктэрин көрүү уонна практическай үөрэх былааннанар. Ол курдук, субуотаҕа муус устар 12 күнүгэр 12.00 чаастан «Мамонт» ханаалга «Саха» НКИХ уонна «Матч ТВ» үлэһиттэрэ бииргэ Хатаска ыытыллар боксаҕа Уһук Илиҥҥэ бастыыр иһин күрэҕи быһа эфиргэ таһаарыахтара.
Санатар буоллахха, «Саха» НКИХ быйыл сайын бэс ыйын 25 күнүттэн от ыйын 7 күнүгэр диэри ыытыллар VIII-с «Азия оҕолорун» оонньууларын быһа эфирдэрин көрдөрөр официальнай бродкастер буолар.
