Гроссмейстер Матрена Ноговицына Саха сирин спордун историятыгар бастакы дуобакка норуоттар икки ардыларынааҕы турнир чемпионката буолла. Бу туһунан «Спорт Якутии» иһитиннэрэр.
Чурапчы улууһуттан төрүттээх кыыс бастакы түһүмэҕи болдьоҕун иннинэ 23 очкуолаах кыайан бастаата. Таллин куоракка күрэххэ уопсайа аан дойдуттан 16 спортсмен кытынна. Матрена Ноговицынаны Саха сирин Ил Дархана Айсен Николаев кыайыынан эҕэрдэлээтэ.
«Бу аҥардас кыайыы эрэ буолбатах — Матрена Саха сирин историятыгар бастакы, Россияҕа классическай бырагыраамаҕа аан дойду иккис чемпиона! Эҕэрдэлиибин! Ис дууһабыттан саҥа кыайыылары, ситиһиилэри баҕарабын!», — диэн Саха сирин Ил Дархана Instagram социальнай ситимҥэ суруйар.
