Бүгүн Петербурдааҕы норуоттар икки ардыларынааҕы гаас форумугар «Газ для России» истиэндэҕэ «Газпром» бырабылыанньатын бэрэссэдээтэлэ Алексей Миллер, РФ Энергетикаҕа миниистирэ Сергей Цивилев, Ил Дархан Айсен Николаев уонна атын регионнар салайааччылара РФ 25 субъегын социальнай эбийиэктэригэр, бырамыысалыннас тэрилтэлэригэр, олорор дьиэлэргэ гааһы киллэрии сиэригэр-туомугар кытыннылар.
«Саха сиригэр бу ураты күн үүннэ. Мэҥэ Хаҥалас улууһун Лоомтука сэлиэнньэтигэр гаас киирдэ. Дойду бэрэсидьиэнэ Владимир Путин сорудаҕынан олоххо киирэр социальнай гаастааһын бырагырааматын көмөтүнэн 200 тахса дьиэҕэ гаас холбонно», — диэн өрөспүүбүлүкэ баһылыга бэйэтин Телеграм-ханаалыгар суруйар.
Ил Дархан «Газпромҥа» уонна Алексей Миллергэ Саха сирин гаастааһынын бырагырааматыгар болҕомтолорун уурбуттарыгар махталын тиэртэ.
«Ону тэҥэ «Сахатранснефтегаз» үлэһиттэригэр төрөөбүт өрөспүүбүлүкэлэрин социальнай эбийиэктэригэр уонна саҥа дьиэлэригэр гааһы киллэрэн холбообуттарыгар барҕа махтал», — диэн Айсен Николаев эттэ.
Хаартыска: sakha.gov.ru
