Быйылгы үөрэх дьылыгар улууска 5689 оҕо үөрэннэ. 9 кылааһы 575 оҕо, 11 кылааһы 394 үөрэнээччи бүтэрдэ.
Сыл устата оҕолор үөрэххэ, успуорка, култуураҕа үрдүк ситиһиилээхтик, бары өттүнэн дэгиттэр, айар-тутар дьоҕурдарынан кыһаллан үөрэннилэр. Оҕолор сыллата араас таһымнаах күрэхтэргэ, куонкурустарга оскуолаларын, улуустарын аатын үрдүктүк ааттаталлар.
11 сыл устата ылбыт билиилэринэн, көрүүлэринэн, сатабылларынан, дьоҕурдарынан, олох киэҥ аартыгар үктэнэр кэрэ-бэлиэ үтүө күнүнэн И.Г. Тимофеев аатынан Майа лиссиэйин выпускниктарын улуус салалтатын, үөрэҕин уонна оскуола салайааччылара, учууталлара, эбии үөрэхтээһин киинин педагогтара, бэтэрээннэрэ эҕэрдэлээтилэр.
Бары эксээмэннэри ситиһиилээхтик туттаралларыгар, талбыт үөрэх кыһаларыгар киирэн, үөрэҕи баһылаан дойду сайдыытыгар үлэлиир-хамсыыр дьон буолан тахсалларыгар кэс тылларын эттилэр.
